ولارڈ ایس بوائل

ولارڈ ایس بوائل

ولارڈ سٹرلنگ بوائل ، سی سی (19 اگست 1924 – 7 مئی 2011) ہک کینیڈین طبیعات دان ہن ۔ او لیزر ٹیکنالوجی دے شعبے وچ ہک بانی ہن تے چارج کپلڈ ڈیوائس دے شریک موجد ہن ۔ بیلکم وچ خلائی سائنس تے ایکسپلوریٹری سٹڈیز دے ڈائریکٹر دے طور تے انھاں چندر تے اترݨ دیاں جاہیں چݨݨ وچ مدد کیتی تے اپالو خلائی پروگرام کیتے مدد فراہم کیتی ۔

6 اکتوبر 2009 کوں ، ایہ اعلان کیتا ڳیا جو او "ہک امیجنگ سیمی کنڈکٹر سرکٹ دی ایجاد – سی سی ڈی سینسر ، جیڑھا جو فوٹو گرافی دے تقریباً تمام شعبیاں وچ ہک الیکٹرانک اکھ بݨ ڳیا ہے" کیتے 2009 دا نوبل انعام برائے فزکس شیئر کریسن ۔

ابتدائی زندگی

19 اگست 1924 کوں ایمہرسٹ ، نووا سکوشیا وچ ڄمے ، بوائل ہک طبی ڈاکٹر دا پتر ہا تے جݙݨ او ݙو سال توں وی گھٹ عمر دے ہن تاں اپݨے پیو تے اماں برنیس دے نال کیوبک منتقل تھی ڳیا ۔ انھاں دی اماں چودہ سال دی عمر تئیں گھر وچ تعلیم ݙتی ، جݙݨ او سیکنڈری تعلیم مکمل کرݨ کیتے مونٹریال دے لوئر کینیڈا کالج ڳئے ۔

تعلیم

بوائل میک گل یونیورسٹی وچ تعلیم حاصل کیتی ، لیکن انھاں دی تعلیم 1943 وچ رکاوٹ دا شکار تھئی ، جݙݨ او ݙوجھی جنگ عظیم دے دوران رائل کینیڈین بحریہ وچ شامل تھئے ۔ انھاں کوں رائل نیوی کوں سونپ ݙتا ڳیا ، جتھاں او سکھدے پئے ہن جو جنگ ختم تھیوݨ تے سپٹ فائرز کوں ائیر کرافٹ کیریئرز تے کداں اتارا ونڄے ۔ انھاں 1947 وچ بی ایس سی ، 1948 وچ ایم ایس سی تے 1950 وچ پی ایچ ڈی ، سب میک گل توں حاصل کیتی ۔

گزر گزران

ڈاکٹریٹ حاصل کرݨ دے بعد ، بوائل ہک سال کینیڈا دی ریڈی ایشن لیب وچ تے ݙو سال رائل ملٹری کالج آف کینیڈا وچ فزکس پڑھیندے ہوئے گزارئے ۔

بیل لیبز

1953 وچ بوائل بیل لیبز وچ شامل تھئے جتھاں انھاں 1962 وچ ڈون نیلسن دے نال پہلی مسلسل چلݨ والی روبی لیزر ایجاد کیتی ، تے سیمی کنڈکٹر انجیکشن لیزر کیتے پہلے پیٹنٹ تے انھاں دا ناں ݙتا ڳیا ۔ انھاں کوں 1962 وچ بیل لیبز دی ذیلی کمپنی بیلکم وچ خلائی سائنس تے ایکسپلوریٹری سٹڈیز دا ڈائریکٹر بݨایا ڳیا ، جنھاں اپالو خلائی پروگرام کیتے مدد فراہم کیتی تے چندر تے اترݨ دیاں جاہیں چݨݨ وچ مدد کیتی ۔ او 1964 وچ بیل لیبز وچ واپس ڳئے ، جتھاں انھاں انٹیگریٹڈ سرکٹس دی تیاری تے کم کیتا ۔

چارج کپلڈ ڈیوائس دی ایجاد

1969 وچ ، بوائل تے جارج ای سمتھ چارج کپلڈ ڈیوائس (CCD) ایجاد کیتا ، جیندے کیتے انھاں کوں مشترکہ طور تے 1973 وچ فرینکلن انسٹیٹیوٹ دا سٹوارٹ بالنٹائن میڈل ، 1974 دا IEEE مورس این لیب مین میموریل ایوارڈ ، 2006 دا چارلس سٹارک ڈریپر پرائز ، تے 2009 دا نوبل انعام برائے فزکس ݙتا ڳیا ۔ سی سی ڈی ناسا کوں خلا توں زمین تے صاف تصویراں بھیجݨ دی اجازت ݙتی ۔ ایہ او ٹیکنالوجی وی ہے جیڑھا اڄ کل ٻہوں سارے ڈیجیٹل کیمریاں کوں طاقت ݙیندی ہے ۔ سمتھ اپݨی ایجاد دے بارے وچ آکھیا: "امیجنگ ڈیوائسز دا پہلا جوڑا بݨاوݨ دے بعد ، اساکوں یقین ہا جو کیمسٹری فوٹو گرافی مر ڳئی ہے ۔" یوجین گورڈن تے مائک ٹامپسیٹ ، بیل لیبز دے ݙو ہݨ ریٹائرڈ ساتھی ، دعویٰ کریندے ہن جو فوٹو گرافی تے ایں دا اطلاق بوائل ایجاد کینی کیتا ۔ بوائل 1975 توں اپݨی ریٹائرمنٹ 1979 تئیں بیل لیبز کیتے ریسرچ دے ایگزیکٹیو ڈائریکٹر ہن ۔

گھروڳی زندگی

ریٹائرمنٹ وچ انھاں اپݨا وقت ہیلی فیکس تے والیس ، نووا سکوشیا دے درمیان تقسیم کیتا ۔ والیس وچ ، انھاں اپݨی ذال ، بیٹی ، جیڑھا جو ہک لینڈ سکیپ آرٹسٹ ہے ، دے نال مل کے ہک آرٹ گیلری شروع کرݨ وچ مدد کیتی ۔ انھاں دی شادی 1946 توں بیٹی نال تھئی ہئی تے انھاں دے چار ٻال ، 10 پوتے پوتیاں تے 6 پڑپوتے ہن ۔

اپݨے آخری سالاں وچ ، بوائل گردے دی بیماری دا شکار تھی ڳئے ، تے ایں بیماری دی وجہ توں ، 7 مئی 2011 کوں نووا سکوشیا دے ہک ہسپتال وچ فوت تھی ڳئے ۔