وقت دے تیر
سائنس دے اصول وقت دی اڳونہی تے پچھونہی سمت اچ کوئی فرق تسلیم نئیں کریندے۔ سائنس دے مطابق وقت دے 3 تیر ہن جیڑھے گزریے ہوئے زمانے تے آوݨ والے زمانے دے درمیان فرق ڈسیندن۔ پہلا تیر وقت دا حرحرکیاتی تیر اے۔ حرحرکیاتی تیر فزکس دی ہک شاخ حرحرکیات [THERMODYNAMICS]دے ݙوجھے قانون کوں ظاہر کریندے۔ اے قانون اے آہدے جو وقت دے نال نال کہیں وی نظام دے وچ بے ترتیبی ہمیشہ ودھ کنوں ودھ تھیندی ویندی اے۔ مثال دے طور تے میز دے اتے ہک شیشے دا پیالہ کہیں نظام دے وچ ترتیب دی علامت اے لیکن اگر او میز توں ڈھہہ تے ٹوٹے ٹوٹے تھی ونڄے تاں ہوندے ٹوٹئیں دا زمین تے کھنڈ ونڄݨ بے ترتیبی کوں ظاہر کریندے۔
اساں اینجھی کائنات اچ راہندوں جتھاں وقت دے نال نال ہمیشہ بے ترتیبی ودھدی پئی اے۔ فرض کرو جو اگر ہک ݙینہہ ایں تھیوے جو پیالے دے زمین تے کھنڈیے ہوئے ٹوٹے آپوں آپ جُڑتے ہک پورا پیالہ بݨ ونڄن تاں سائنس آہدی اے جو اے کم صرف اینجھی کائنات اچ ممکن اے جتھاں وقت دے نال نال بے ترتیبی گھٹدی پئی ہووے۔ ایہا وجہ اے جو ساݙی کائنات تے ٹوٹئیں دا رل تے پورا پیالہ بِݨ ونڄݨ ناممکن اے کیوں جو اساں اینجھی کائنات اچ راہندے پیوں جتھاں وقت دے نال نال ہمیشہ بے ترتیبی ودھدی پئی اے۔
ݙوجھا تیر وقت دا نفسیاتی تیر اے۔ ایں تیر دی سمت اینجھی اے جو اساں اپݨا گزریا ہویا وقت تاں یاد رکھیندوں لیکن آوݨ والے وقت کوں یاد نسے رکھ سڳدے۔
وقت دا تریجھا تیر کائناتی تیر اے۔ ایں تیردارُخ اوں پاسے ہے جیڑھے پاسے کائنات پھیلدی پئی اے۔
اگرتُساں اسٹیفن ہاکنگ[STEPHEN HAWKING] دی کوئی اینجھی کتاب پڑھو جیندے 190 صفحے ہوون تے ہوں کتاب دے ہر لفظ کوں یاد رکھو تاں تواݙے حافظے اچ معلومات دے 2 ملین ٹکڑئیں دا اضافہ تھیسی لیکن ہیں کتاب کوں پڑھدئیں ہوئیں تُساںاپݨی غذا دی شکل اچ، حرارت یا پسینے دی شکل اچ 1000 حرارے (کیلوریز) دی منظم توانائی خرچ کریسو۔ ہیں کم دی وجہ کنوں کائنات اچ 20 ملین ملین ملین ملین ٹکڑئیں دی بے ترتیبی دا اضافہ تھی ویسی جیڑھا تواݙے حافظے اچ معلومات دی ترتیب نال تھیوݨ والے اضافے کنوں 10 ملین ملین ملین گنا زیادہ اے اور اے وی ہوں وقت تھیسی جے تُساں ہاکنگ دی کتاب دے ہر ہر لفظ کوں یاد رکھیا۔
حوالہ
[لکھو | ماخذ وچ تبدیلی کرو]کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان