وفد کنانہ

وفد کنانہ 9ھ وچ بارگاہ نبوی وچ حاضر تھیا۔

ایں وفد دے امیر کارواں واثلہ بن اسقع ہن۔ کجھ جاء تے ایں وفد دا ناں وفد واثلہ بن الاسقع اللیثی وی لکھیا ڳیا ہے اے سب لوک دربار رسول اکرم صلی اللہ علیہ و آلہ وسلم وچ اوں ویلے آئے جݙݨ تساں غزوہ تبوک دی تیاری فرمیندے پئے ہن۔ تساں نے صبح دی نماز نال ادا کیتی۔ آپ نے پچھا تساں کون ہو؟ تہاکوں کیا چیز ڳھن آئی ہے؟ اتے تہاݙی حاجت کیا ہے؟ انہاں نے اپݨا نسب ݙسایا اتے آکھیا کہ تہاݙی خدمت وچ اللہ اتے ایندے رسول تے ایمان ڳھن آوݨ کیتے حاضر تھیا ہوں۔ لہذا جیہڑا میں پسند کراں ایں تے میݙے توں بیعت ڳھن ڳھنو۔ آپ نے انہاں توں بیعت ڳھدی۔ او جݙݨ اپݨے گھر آلیاں وچ واپس ڳئے تاں انہاں دے والد نے آکھیا بخدا میں تہاݙے نال ڳالھ نا کریساں اتے سواری مہیا کرݨ توں وی انکار کر ݙتا۔ انہاں دی بھیݨ نے گفتگو سݨی تاں ایمان ڳھن آئی اتے انہاں دا سامان درست کیتا۔ او رسول اللہ صلی اللہ علیہ و آلہ وسلم دے کول واپس آئے تاں پتہ چلا کہ آپ تبوک روانہ تھی چکے ہن۔ انہاں نے آکھیا کہ ہے جیہڑا میکوں وی نال سوار کر کے ڳھن ونجے میݙا مال غنیمت ایندا ہوسی۔ کعب بن عجرہ نے انہاں کوں اپݨے نال اوٹھ تے سوار کر ڳھدا، اتھوں تک کہ انہاں کوں رسول اللہ صلی اللہ علیہ و آلہ وسلم دے نال ملا ݙتا اتے اے تبوک وچ رسول اللہ صلی اللہ علیہ و آلہ وسلم دے نال حاضر تھئے۔ رسول اللہ صلی اللہ علیہ و آلہ وسلم نے انہاں کوں خالد بن ولید دے نال اکیدر دی طرف بھیجا۔ اتھوں جݙݨ مال غنیمت حاصل تھیا تاں انہاں نے کعب بن عجرہ کوں ݙتا لیکن انہاں نے واپس کر ݙتا کہ میں نے اللہ دی رضا کیتے تہاکوں سوار کیتا ہئی۔