وفا چشتی

ج:17جون 1953ء

وفا چشتی سئیں دا ناں محمد رفیق چشتی ہے ۔ آپ 17جون 1953ء اِچ دیرہ نواب صاحب اِچ پیدا تھئے ۔ اسلام آباد اِچ سرکاری نوکری کریندن ۔ لمبے عرصے کنوں شاعری کریندن ۔ ہرصنف سخن اِچ لکھدن ۔ انھاں دی غزل دے کجھ نمونے پیش خدمت ہِن۔

غزل

بھال تَتّی دی بھال ونڄیں ہا

سول مٹھی دے ٹال ونڄیں ہا

بُھل ڳیوں پیت پرم دیاں رِیتاں

کیتے قول تاں پال ونڄیں ہا

تانگھاں دے وچ عمر وِہا ڳئی

پھیرا پا پُچھ حال ونڄیں ہا

وَس رَس سڳدا جے نہ ہانویں

بھائیں لا گھر جال ونڄیں ہا

جیندیں مُہت نہ ݙتڑو، مویاں

قبر تے ݙیوا ٻال ونڄیں ہا

مر مر غریباں دے ݙینہ رات گزردے پِن

جی جی تے عذاباں وچ جُکھ جُکھ تے نجھردے پِن

پوہ مانگھ دی کوجھی رُت نکلݨ کوں نی آندی پئی

ٻوٹیاں تے رَتانجݨ ہے ، وَݨ پالے توں مردے پِن

ہے سئیت وسوکی کھیݙ ، عمراں دا وݨج وپار

کوئی ہار تے جِتدے پِن کوئی جیت تے ہردے پِن

تڑ تاݙے غریباں دے ، جے ہن وی تاں کچے ہِن

کردے پِن ݙینہ رات یا سِمدے تے جَھردے پِن

مُد ساکھ اندھاریاں دی ٻس گزرݨ والی ہے

او ݙیکھ سویرے دے آثار نظردے پِن

ہک ݙوں دے نصیباں وچ اَݨ ڳیݨویں ولتݨ ہے

سئے لوک وفاؔ چشتی بکھ تریہہ توں نمردے پِن

غزل

آ وَس ساݙڑے کول میاں جی

کوجھ نہ ساݙے پھول میاں جی

تیݙی دید کیتے اِتھ آیم

ہر دم تیݙی ڳول میاں جی

اَزلوں لایُم نینہہ اولڑا

پیتم ݙکھڑے جھول میاں جی

نِت دے ہِن مہمان اَساݙے

درد برہوں دے ٹول میاں جی

سوز ، ہجر ، ݙکھ ، مونجھ ، مونجھاریاں

سوغاتاں انمول میاں جی

کون وفاؔ چشتی کوں ڳولے

کون ہے ایجھا رول میاں جی

لُوں لُوں سیس سریر، وسدا چور دلاں دا

ساݙے دِل دی دھیر سانولڑا من بھاندا

درداں حال زہیر ، برہوں جان کو ںکھاندا

جگرا چیرو چیر ، ݙکھ چوانگ نہ ماندا

تن من لیر کتیر ، ہک ہک پَھٹ کُرلاندا

ݙسدی دور ملہیر مارو پندھ تھلاندا

فکرے درد کشالے ݙکھڑے سُول سڑاپے

لڳڑی لیکھ لکیر ، آیا بار غماں دا

پلڑے ݙوہ ݙوہاڳ ، سُنڄڑے بھیڑے لیکھ

ویری تھئی تقدیر ، جھورا کھاوِم ہاں دا

یار پُنل دی تانگھ اَزل دی وٹھڑی سانگ

کیتس محض فقیر گھر ور مول نہ بھاندا

ڳئی ݙکھ دی مُد ساکھ ، رُت سُکھ بھاڳ دی آئی

پیر ملیم شبیر، جی ݙکھ دردوں واندا

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان