وسیب دیاں ڳالھیں
ابے سئیں کول ڈھیر لوک اَمدے ، وسیب دیاں ڳالھیں کریندے ہن ، اسیکوں وسیب دا علم تھیندا ہا،سرائیکی شاعر احسن فقیر گڑھی آلے دا ابے سئیں کول آ ونڄ ہا ، شاعری دے نال سرائیکی خطے دی اُنہاں کوں ڄاݨ پچھاݨ ہئی ۔ سسی دے ڄم پَل دی ڳالھ کیتی تے آکھیا جو بھٹہ واہݨ وچ ہک ݙو منزلہ مگر خستہ عمارت اے جیں دے وچ سَسی جمی ہائی۔شہر بھٹہ واہݨ زمین دے ابھار تے بنڑیا ہویا اے۔آوݨ آلے کوں پرے کنوں اے ماڑی نظر امدی اے۔ایں ماڑی کنوں کوئی ݙڈھ میل دے فاصلے تے جھکا علاقہ ہے۔جتھاں پراݨی سلھاں نال پوڑیاں بنڑیاں ہویاں ان۔نال جیڑھا زمین دا جھکا علاقہ ہے او صدیاں پہلے وہݨ آلے دریا دا نشان ءِ۔سسی کوں ایں دریا دے موجیں دے حوالے کیتا ڳیا ہا۔ایں نسبت نال اے جاہ سسی دی ماڑی مشہور اے۔ ججہ عباسیاں اچ حضرت حبیب سلطان دے مزار ۔ ایں توں علاوہ سجادہ نشین مولوی عبدالرحمن دے والد مرحوم خواجہ عبداللہ عینی تے ݙاݙا مرحوم خواجہ احمد بخش اوحدی دے مزارات ہن۔712ء وچ محمد بن قاسم اتھاں آیا ہا۔ رسول بخش اُلفت ڄیٹھے بھٹے دی ڳالھ کیتی جوخانپور دے نیڑے جیٹھ بھٹہ دے ناں تے ہک ریلوے اسٹیشن ہے ، اتھاں ہک شوگرمل ہے ۔1963ء ءِچ حئی سنز دے ناں تے بݨی ۔ایں اکتوبر 1964ء اچ کم شروع کیتا ۔ اتھاں وݙا شوگر فارم وی ہے، ایں رقبے تے زرعی یونیوسٹی بݨݨ دی ضرورت ہے ۔اتھاں جیٹھہ بھٹہ دی خانقاہ وی ہے جیں توں ایں جاہ دا ناں جیٹھہ بھٹہ پئے ڳیا۔ آکھیا ویندا ہے جو جیٹھہ بھٹہ تے غلام محی الدین ترائے بھرا ہن۔ بزرگ ڈاکواں نال لڑدے ہوئے شہید تھی ڳئے ، اتھاں ٻہوں عقیدت مند امدن ، روہی دے مرید ٻہوں ہِن ۔ شوگر مل علاقے دی ترقی ءِچ اہم کردار ادا کیتا ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان