وستی دی حیات

پہلے اساں ہک ایہوجئیں بھوئیں تے وسدے ہاسے جیڑھی قصے ، شاعری ، کھیڈاں ، علوم و فنون ، محبت ، امن، خُشحالی ، تے بہادری دا پنگھوڑاہئی۔ ایندے وچ ست دریا اپݨے ڈھیر سارے بانہہ بیلی دریاویں سمیت واہندے ہن۔ تے اے سارے دریا مختلف وستیں وچوں لنگھ تے ایتھاں کٹھے تھیدن تے لمیں دو سیکڑیں کوہیں دا پندھ کر تےسمندر اِچ ونج ݙھاندن ایں زرخیز وادی اِچ کݨک ، کپاہ ، چاول تے ݙوڄھیاں فصلاں زور دیاں تھیندن۔تے ایتھو دے لوک وڈے رڑھ وَاہِن۔ اے وادی چرند پرند دی ما أہے۔ جیندی جھولی اچ ہرݨ، پاہڑے ، گئیں ، تتر ، تلہور ، کونجاں تے ڈوجھے پکھی تے جانور مٹک مٹک تے ٹردن ۔ تے امن دی ایں بھوئیں تےاْݙاکڑیاں مریندن ۔ ایں وسیب وچ نہ صرف رڑ ھ وائی تھیندی اے بلکہ کپاہ ، مٹی دے نفیس تھانویں تے بݨیے ہوئے پھل بوٹے اتھوں دی فنی مہارت دے شاہکا ر ہن۔ایں بھاگ بھریئے وسیب اچ تلےِ تے چاندی دے تاریں نال ہولیاں پھْل جْتیاں تے کھسے بݨائے ویندے ہن۔ مردیں دے سر تے بدھݨ کیتے سوݨیاں ریشمی لنگیاں بݨایاں ویندیاں ہن۔ چولے تے ہار کڈ بھئے ویندے ہن۔ پلنگ ، کھٹوں ،صندوقاں ، مونہہ  ݙلکھن دے شیشے تے با لیں دے سر بلہاوݨ آلے مرکھے رنگین تے سْہݨیں ہوندن۔ جہناں کوں شیشے نال سنگھار یا ویندے تےاِتھاں پَڑچھے ، سْندھڑے ،اتے چادریں وچ مختلف  رنگیں نال پھل بوٹے بݨائے ویندے ہن۔ ایں وسیب اچ ہر پاسے ساوِل گْھلدی ہوا اچ جھمراں مریندی ہے تے پھْل ہک بئے کوں گلکڑیاں پیندن۔ اٹھیں دی چھیݨ چھیݨ تے شَرنادی سْر تے حَا نچیں دی روح جھمراں مریندی بَنڑی دے گھردوجنج توں پہلے پجݨ کیتے دھرو کڑیاں مریندن تے رنگین کھٹوں تے باندھن۔

حوالہ

سرائیکی افسانے تے ناول وچ دیہاتی منظر نامہ، تحقیقی و تنقیدی مطالعہ (مقالہ نگار: صبیحہ منظور )  نگران مقالہ ڈاکٹر مقبول حسن گیلانی