وستی آڑہ

دائره دین پناه پرانے اڈے آلی سڑک کوں سدھا پچاه تے گھدی آو تاں اگو هک وستی آڑه آندی هے پر خیال کراهے سڑک ڈو عظیم جنگاں(پی ٹی سی ایل ت گیس پائپ لائن) بھگتائ پئ هے هنڑ ایندی کنڈ یتیم دے سینے آلی کار چھلنی هے احتیاط نال آواهے جمپ جیهڑے محلے اچ زیاده هوون سمجھ ونجاهے اتھاں منصوبه بندی آلے کاےنی آے ت ماء پیوء بالیں ت کنٹرول کر نی سگیا تهوں روڈ مشق ستم بنڑیا پۓ.وستی دی مکویں سرے ت واحد پرائمری سکول آرام فرما هے بزرگ آهدن ماسٹر جمشید صاحب ت ماسٹر محمد حسین قاضی صاحب دے زمانے اتھائیں پڑھائ وی هوندی هئ پر اساں صرف تراۓ کمرے ت چار سرینه ڈٹھے هن اج جنهیں دی بلوغت چار دیواری دی چادر اچ چھپی کھڑی هے اوں زمانے تاں کمریں کوں روشن تے هوادار رکھنڑ لو کھڑکیاں تروڑنڑ دا خصوصی انتظام کیتا گیا ها. اگیں شاگرد, استادیں سمیت "صاحب" آلی ٹیم توں ڈردے هن پر سنڑیے سے تبدیلی آئ هےجو هک استاد, صاحب کوں ونجا ڈتے ت لهو لهان کر ڈتے.خیر.... کل جان آصف اعوان موجوده A.E.O دائره میکوں آهدے تیڈی وستی دےلوگیں کوں ملنے جو بال سکول بھیجن توں نال جلیں تاں میں صرف اتنا عرض کیتے اتھاو اندازه کر گھن جو میں ایں سکول اچو پڑھ تے مزدور بنڑیاں تے توں اتھو نه پڑھ تےافسر. آخری آرام گاه قبرستان ایں درس_عبرت گاه وچ وڑ آۓ یا اے سکول قبرستان اچ ونج وجیے اے مسئله, مسئله کشمیر هے البته وستی دے لوگ هک بے دی ڈھاک تے کھڑے سکول تے قبرستان ڈوهیں کولو آپ وی ڈردن ت بالیں کوں وی ڈریندن جو اڈیں نه ونجاهے. البته اج تک ایں قبرستان اچ داخلےلو کڈاهیں تنازعه نی بنڑیا هر قوم, نسل ت مسلک دا بهشتی اتھاں ستا پۓ میڈا اپنا بھتریجا حافظ خالد محمود وی اتھائیں ستا پۓ. البته هک دفعه دائره شهر دے اهل تشیع پاکستانی بھرا اپنی دلدل (شبیه ذوالجناح) دفن کرنڑ واسطے آے هن جتھاں جو کافی گرمی دےبعد او اے آهدے هوۓ پچھو ت ول گۓ جو شکر هے مولا پاک توهین توں بچ گۓ اے مردودیں دا قبرستان مولا دے قابل نی.اگو ت ونجنڑ کے پهلے ڈساں جو ایں قبرستان اچ انهیں دی کربلا وی موجود هے جتھاں هر سال چاچے عبدو دی دکان دے چھپر چا کے جلوس آن مکدے ت شام غریباں پڑھی ویندی هے.اور ساڈی وستی وچو الحمدالله اج تک ایں جلوس کوں کهیں قسمی کوئ اوکھ نی تھیا نه هی شالا تھیونڑ ڈیسوں......

قبرستان تو یاد آۓ جتنی اے وستی پرانی هے اتنی هی پرانی هے اتھو دی کمبهار بیادری. اج دے جدید ترین دور ءچ وی اے اتنی هی پرانی هے جتنی پرانے دور اچ پرانی هوندی هئ. اگر اے قوم نه هوندی تاں اے قبرستان وی نه هوندا. هیلو... ڈر کیوں گئیں? اے بندے مریندے نی صرف قبر کھٹیندن بنده مردا تاں شانگرو کمبهار دی چاه, اعجازی کمبهار دی سبزی, عامر کمبهار دا اچار تے بشیری کمبهار دے پکوڑے کھا تے هے. حنیفی کمبهار دے چھولے تے مظهری کمبهار دی لیمن آلی بوتل وی ڈھگ بندیں دی جان ایں جهان تو چھڑوائ ودی هے. هک جھیڑے وچ میں گیاں تاں پته لگے هک وستی آلا آهدے اے میڈے پیوء بهشتی دی قبر هے تے اے آهدے چاچے سرور دی هے. میں آکھیے تساں ڈوهیں سچے هیوے پر هک بے دی گال نیوهے سمجھی.اتھاں دفن تهاڈا ابا بهشتی هے تے قبر کھٹی چاچے سرور هئ. سب توں وڈی کوالٹی جیں توں میں خوش تھینداں تے میڈا وڈا بھرا مقصود قمر نراض تھینے او هے انهیں دا وفادار هوونڑ. اندازه کرو 2010 دے سیلاب اچ 100% ریلیف عمران خان تو گھن کے وی ووٹ پی ٹی آئ دے مخالف امیدوار کوں ڈیندن. خیر اے غیر سیاسی انشائیه هے. گنڑ گنڑ کے وی صرف 3 اعلی تعلیم یافته کمبهار نظردن او وی میٹرک پاس.اور اے او قوم هے جیهڑی بال دا ناں گولنڑ توں پهلے نک نیم گولیندی هے اور اے وی سچ هے جو سنجھ کوں بال گولنڑیں پۓ ویندن پر سویر تک پورے نی تھیندے کیوں جو انهیں کوں ڈاه کولو اتو گنتی نی آندی پر اولاد آندی هے. پانڑی دی کوئ کمی کائنی وستی اچ لیکن کمبهاریں دے بال پانڑی میلا کرنڑ گناه سمجھدن ات لو آپ میلے ودے رهنن. الله لگی گال کراں تاں پوری بیادری اچ ڈو بندے هن جنهیں کوں ڈیکھ تے میکوں رشک آندے چاچا عبدو تے فیاض حسین... مکمل دین تے عمل پیرا تے پوری بیادری اچ ایهے ڈو نمازی, چهرےتے سنت رسول الله, هتھ تے زبان دے تیریں تےمکمل کنٹرول. جوانی دی عبادت الله کوں بهوں پسند هے ات لو فیاض کمبهار (جیندا اصل ناں شید او آپ وی بھل گیا هوسی) میکوں بهوں بھاندے اور اےمحنت هے تبلیغی جماعت تے وستی وچ موجود واحد مدرسه جامعه ابوبکر صدیق رض دےمهتمم حضرت عبدالمجید قاسمی صاحب دی.

ویندا وگدا........(منصور شانی)