وساخی

وساکھ دی پہلی تاریخ کوں وساکھی منائی ویندی ہے۔

اج سرائیکی وسوں اچ وساخی دا پہلا ڈینہہ ہے ۔ ایں ڈینہہ دی مناسبت نال ''[[سرائیکی]] ایریا سٹڈی اینڈ ریسرچ سنٹر" ذکریا یونیورسٹی [[ملتان]] دی طرفوں " "وساخی میلے ''دا اہتمام کیتا گیا ۔

تقریب دی صدارت سرائیکی ایریا سٹڈی اینڈ ریسرچ سنٹر دے ڈائریکٹر ڈاکٹر ممتاز کلیانی نے کیتی جاں جو وائس چانسلر بہاءالدین زکریا یونیورسٹی ملتان خاص مہمان ہن ۔

پروفیسر عمار یاسر ۔ پروفیسر محمد عارف ۔پروفیسر نسیم اختر صاحبہ تقریب دے اگوانڑ ہن جاں جو ایں موقع دے مہمان پروفیسر اکرم میرانی ۔پروگرام منیجر ریڈیو پاکستان ملتان ڈاکٹر خالد اقبال ۔ سابق ڈائریکٹر کالجز ملتان شمیم عارف قریشی ۔پروفیسر اکرم میرانی ۔ معروف دانشور تے شاعر عبداللطیف بھٹی۔ محمود مہے تے پروفیسر اشرف جاوید ملک کوں سڈئیا گیا ہئی ۔

سرائیکی شعبہ دا عملہ شعبہ دے طلباء تے طالبات نے ایں موقع دی مناسبت نال مختلف کھاونڑ پیونڑ دیا ں شہیں ۔۔

ملتانی ڈولی روٹی ۔ گڑ آلے چاول ۔ ستو ۔ جلیبیاں ۔ مٹھے ڈھوڈے ۔ باجرے مکئ تے چاولاں دی روٹی ( چلڑے ' گندلاں دا ساگ ۔مکھنڑ تے لسی دے سٹال لائے ہوئے ہن تے نال ای نال سرائیکی فوک لور موسیقی دی تال موجب جواناں دی سرائیکی تاڑی آلی جھمر وی کھیڈی ویندی پئی ہئی ۔۔۔

تقریب دا اہر وائس چانسلر نے کنڑک دی کپائی کر کے کیتا تے بنہاں مہماناں وی ہک ہک ڈو ڈو مونہے کنڑک دے کپئیے ۔۔۔ اے شاندار تقریب بہون رنگولی تے محبتاں سجری ہئ' جیندے وچ ملتانی چنیان سرائیکی اجرک تے کتاباں دےسٹال وی لائے گئیے ہن ۔

ڈاکٹر ممتاز کلیانی نے سرائیکی وسوں دی ریت موجب اپنڑیں ہتھیں مہمانین کوں ساگ چلڑے مکئ دے ڈھوڈے مکھنڑ گاوی لسی تے ڈولی روٹی نال ناشتہ کروایا تے جوانیں کوں انہاں دی جھمر پاروں داد ڈتی ۔ شعبہ اردو وچوں آونڑ والے استاداں ڈاکٹر فرزانہ کوکب ڈاکٹر ساجد خان' ڈاکٹر شاذیہ عنبرین 'ڈاکٹر حماد رسول تے ڈاکٹر سجاد نعیم تے بنہاں رلدے مہماناں نے سٹال در سٹال ٹر پھر تے شہیں مل گدئیاں تے طلباء دے پکواناں دی دل نال تریف کیتی ۔۔۔

سرائیکی وسوں دا اے یادگار وساخی میلہ" دھمی ڈاہ وجے کنوں گھن کے دیگر چار وجے تئیں جاری رہئیا تے ڈھول دی تھاپ دے طلباء نے جھمر تاڑی دا شغل وی جاری رکھئیا ۔۔