ورتݨ آلے نال ڳالھ مہاڑ:اطہر لاشاری

اسلامیہ یونیورسٹی بہاولپور دا پچھوکڑ آتے اڄ

یونیورسٹیاں کہیں وی ویسوں دی ترقی اتے خوشحالی کیتے نشابُر کردار ادا کریندن ۔ یونیورسٹیاں اگونہی اتے نویکلے پن سانگے چھڑا لوکیں کوں ای تکڑا نئیں کریندیاں بھل ایں اگونہے پندھ اتے وٹاندرے دے عمل اچ سُنڄاپو کردار وی نبھیندن۔ ریاست بہاولپور دے علم دوست حکمرانیں مصر دی یونیورسٹی جامعہ الاظہر وانگوں بہاولپور اچ ہک اینجھی دانش گاہ دا ایرا بدھیا جہڑی ہزاراں سالاں تئیں علم دا سوجھلا جگ جہان اچ ونڈیندی راہسی۔ اسلامیہ یونیورسٹی بہاولپور دی منڈھلی شکل مدرسہ صدر علوم دینیات دے طور تے سامھڑیں ائی جہڑی وت 1825 اچ جامعہ عباسیہ دے ناں نال سُنڄاپو تھئی، ایں جامعہ دے موہری شیخ دے منصب سے مولانا غلام محمد گھوٹوی، اتے نائب شیخ الجامعہ کیتے مولانا احمد علی بلوچ کوں تعینات کیتا گیا ۔ 1950 اچ ریاست بہاولپور دے آخری حکمران ہز ہائنس نواب سر صادق محمد خان عباسی پنڄویں دے حکم تے صادق ایجرٹن کالج دے نیڑے ہک شاندار عمارت بݨائی گئی اتے ایں جامعہ عباسیہ دا مرکزی کیمپس قائم تھی گیا جہڑا جو اڄ ایں یونیورسٹی دی سنڄاݨ ہے اتے اولڈ کیمپسں تے عباسیہ کیمپس دے ناواں نال سنجاتا ویندے ۔ ایں عباسیہ کیمپس اچ وائس چانسلر سیکٹریٹ، یونیورسٹی انتظامیہ دے مرکزی دفاتر، قانون دی فکیلٹی، طالب علماں دے ہاسٹلز، مہمان خانے، شعبہ امتحانات، بنک اتے کھیڈاں دے میدان ہن پئے۔ 1963 اچ پاکستان دے صدر فیلڈ مارشل جنرل ایوب خان جامعہ اسلامیہ دا دورہ کیتا اتے ایں یونیورسٹی دے بݨݨ اچ اسلامی خیال پاروں ایندا ناں جامعہ عباسیہ توں وٹا کراہیں جامعہ اسلامیہ رکھ ڈتا ۔ نواب آف بہاولپور دی بݨائی گئی جامعہ عباسیہ بعد اچ جامعہ اسلامیہ اتے ول 1975 اچ اسلامیہ یونیورسٹی آف بہاولپور دے ناں توں پنجاب اسمبلی توں چارٹر کیتی گئی۔۔

اجوکی اسلامیہ یونیورسٹی بہاولپور

ایں ویلے اسلامیہ یونیورسٹی دے بہاولپور اچ ترائے بہاولنگر اتے رحیم یار خان اچ ہک ہک کیمپس ہن پئے عباسیہ کیمپس کا رقبہ 26 ایکڑ ، بغداد الجدید کیمپس دا 1257 ایکڑ خواجہ فرید ( ریلوے ) کیمپسں دا رقبہ ترائے ایکڑ بہاولنگر کیمپس 50 ایکڑ اتے رحیم یار خان کیمپس دا رقبہ 80 ایکڑ ہے۔ روہی چولستان اچ قلعہ ڈیراور دے نیڑے 85 ایکڑ رقبے تے بائیو ڈائیورسٹی پارک دا اہر وی اسلامیہ یونیورسٹی بہاولپور کیتے جیندے اچ روہی دے بوٹیاں تے تحقیق دا کم کیتا ویندا پئے۔ ایں ویلے اسلامیہ یونیورسٹی بہاولپور ہک جدید، شاندار اتے پر رونق ادارہ بݨ گئی ہے جتھاں اُچیاں اُچیاں ماڑیاں، ساوے چُچ میدان ، نویکلے انداز دے ہاسٹلز، استاداں اتے ملازماں دے راہݨ دیاں کالونیاں ،کئی تحقیقی فارم، اتے ونکو ونکی دے باغ ایندے سنڑہپ کوں نشابر کریندے کھڑن۔ اسلامیہ یونیورسٹی اچ ایں ویلے 19 فیکلٹیاں اتے 135 شعبہ جات کم کریندے پئین جنہاں اچ 53 ہزار توں ودھ طالبا پڑھدے پئین۔ انہاں بالاں کوں کوں پڑھاوݨ کیتے 1800 توں ودھ استاد ہن جنہاں اچوں 500 توں ودھ پی ایچ ڈی ہن ۔26 جولائی 2019 کوں پنجاب حکومت ولوں اسلامیہ یونیورسٹی دی مُہار انجینئر پروفیسر ڈاکٹر اطہر محبوب دے ہتھ ڈتی گئی۔ پروفیسر ڈاکٹر اطہر محبوب ہک جگ مشہور ماہر تعلیم اتے مثالی منتظم دے طور تے سنجاتے ویندن ، ڈاکٹر اطہر محبوب سئیں کئی ملخاں اچ تعلیمی، تحقیقی اتے صنعتی اداریاں اچ کم کرݨ دا 25 توں ودھ دا تجربہ رکھیندن۔ انہاں نیشنل یونیورسٹی سائنس اینڈ ٹیکنالوجی توں الیکٹریکل انجینئرنگ اچ پی ایچ ڈی کیتی جڈاں جو بی ایس اتے ایم ایس دی تعلیم فلوریڈا اسٹیسٹ یونیورسٹی توں گھدی۔ انہاں صُفہ یونیورسٹی ڈیفنس ہاؤسنگ اتھارٹی کراچی اچ کئی سال بطور پروفیسر اتے ڈین دے اپݨیاں خدمات ڈتن۔ ایں توں علاوہ انہاں کئی بئے سرکاری اتے پرائیویٹ اداریاں اچ وی بہوں اچے مقام تے بہوں شاندار کم کیتے ۔ ڈاکٹر اطہر محبوب اب خلدون سسٹم دے بانی ہن اتے 100 توں ودھ صنعتی ، مالیاتی اتے دفاعی اداریاں نال پراجیکٹس کر چکیئن۔ او ہک محنتی فرض شناس اتے قابل شخصیت ہووݨ پاروں پاکستان اچ سنڄاپو انجینئر، بہترین منتظم ماہر تعلیم اتے صنعتی ماہر دے طور تے سنجاتے ویندن۔ حکومت پاکستان سائنس، ٹیکنالوجی اتے تعلیم دے میدان اچ مہان کم کرݨ پاروں انہاں کوں 2012 اچ تمغہ امتیاز نال نوازیا ۔ پروفیسر ڈاکٹر اطہر محبوب اسلامیہ یونیورسٹی بہاولپور توں پہلے خواجہ فرید یونیورسٹی آف انجنیئرنگ اینڈ انفارمیشن ٹیکنالوجی رحیم یار خان دے بانی وائس چانسلر دے طور تے کم کر چُکن۔ بطور بانی وائس چانسلر انہاں خواجہ فرید یونیورسٹی دے ناں تے سرائیکی وسیب دے پروبھرے اتے پسماندہ علاقے اچ ہک جدید اتے اسٹیٹ آف دی آرٹ یونیورسٹی بݨا تے ملک دے اندر اتے پورے جگ جہان دے تعلیمی حلقیاں وچ اپݨی قائدانہ انتظامیہ صلاحتیاں دا سکہ منوا چکن۔