واہ ساݙی قسمت

کہیں ویلھے وݙیںدیاں حرکات اَتے رویے وی معصومانہ تھی ویندن ۔ میݙی سس صاحبہ ہک دفعہ مارکیٹ مرغی دا گوشت گھنݨ ڳئی ، گھروں آکھ تے ڳئے تساں مرغی مہانگی گھن آندے ہیوے ، میں آپ گھن آساں ، اَڄ بازار ڳئے تاں دکان دار کنوں پُچھیا پُتر مرغی دا گوشت کیویں ݙیندا پئیں ۔ اوں آکھیا اماں جی180روپے کلو ہے ۔ میݙی سس صاحبہ آکھیا چیتا رُلیا بیٹھی ؟ اِتی مہانگ لئی ٻیٹھیں ؟ اوں شودے آکھیا اماں جی ناراض تاں نہ تھیوو اچھا چلو تساں آپ چا ݙسو تہاکوں کِتی تئیں وارے کھاندے تھی سڳدے ، میݙا پُڄالا پوسی تاں میں ݙے ݙیساں ۔ میݙی سس صاحبہ آکھیا مَیں بس 250(ڈھئی سو روپے) کلو گھنساں۔

پووی پُڄالا تاں ݙے ، نی تاں نہ سہی ۔ ݙسا مَیں گھر ونڄاں اوں آکھیا اچھا اماں جی جیویں تساں آکھیئے اونویں ٹھیک ہے ۔ ݙیوو پیسے ، اِنھاں پیسے ݙتے اوں گوشت بݨا تول تے انھاں دے حوالے کیتا ۔ خوشی خوشی گوشت گھن تے گھر آئے شام کوں سارے کٹھے ٻیٹھے ہن ڳالھ تھئی ، گوشت دی تاں سس صاحبہ پتراں کوں ݙسایا تساں وی گوشت گھن آندے ہیوے ۔ اَڄ مَیں چنگی تراہویں مُکا چُکا تے رعایت نال اَتے سستا گھن آئی ہاں ۔ پتراں پُچھیا اچھا اماں او کیویں اماں آکھݨ لڳے ، دکان دار میکوں آکھیئے 180روپے کلو ݙیساں پر مَیں اونکوں آکھیے رعایت کر اوں میکوں آکھیے اچھا تہاکوں کیویں وارے کھاندے تاں میں آکھیئے مَیں تاں ڈھئی سو روپے کلو گھنساں ۔ سارے گھر دے بندے کِھل کِھل کنوں ٻݙے پئے ہن ، سس صاحبہ آکھن کیا ہیوے کیوں اِتی کِھلدے پئے ہیوے ۔ ٹھیک تاں ہیوے؟ انھاں ݙسایا واہ اماں جی تساں چنگی رعایت کروا اَئے ہیوے ۔ ہتھوں ستر70روپے زیادہ ݙے آئے ہیوے ۔ انھاں سوچیا تاں آکھیا ہائے پتا نی مَیں کیا سوچ تے اُونکوں وادھوں پیسے ݙے اَئی ہاں ۔ ہائے سُنڄا چیتا میݙا اَڄ تئیں وی اُنھاں دے ٻالاں کوں جئیں ویلھے شرارت سُجھے ۔ ماء کوں یاد ݙیویندن ۔ اماں کیویں سستی مرغی گھن آئے ہاوئے ۔ او شرما ویندن ، میݙی شادی توں پہلے میݙے سسرال ہک شادی ہئی ۔ ٻئے شہر ونڄݨاں ہا ۔ میݙی سس صاحبہ میݙے سورھے صاحب کنوں اجازت گھدی جو مَیں شادی اُتے کلھ ونڄاں؟ انھاں آکھیا چلو ونڄیں پئی شام تھئی تاں بدل آ ڳئے رات کوں مینہ وسݨ پئے ڳیا ، سس صاحبہ پریشان جو اجازت تاں مِل ڳئی ہے پر مینہ وسݨ پئے ڳئے کیا پتہ ونڄ سڳساں؟

جیویںجیویں او پریشان تھیون مینہ اُتی زور دا وسَسے ۔ ساری رات پاسے پھریندن ، اتے آکھن واہ ساݙی قسمت سویر کوں مینہ رُک ڳیا ۔ سس صاحبہ شادی اُتے لنگھ ڳئے ،واپس اَئے تاں سارے انھاں کوں ڳالھ ڳالھ اُتے آکھن واہ ساݙی قسمت او جو اَڄ تئیں انھاں کوں آہدن اماں کیویں ساری رات پاسے پھریندیں آکھیا ہاوے ’’واہ ساݙی قسمت‘‘۔ تاں میݙی سس شرما ویندن۔

ایویں کجھ ݙینہ پہلے میݙے مُلیر محمد اختر ہاشمی صاحب دی دھی صائمہ بی بی اپݨی بیٹی مُسکان دی رسم ’’آمین‘‘ اَتے اساکوں سݙیا ، اساں پوری تیاری کر رکھی ۔ سویرے ملتان ’’آمین‘‘ اُتے ویسوں پر رات کوں تیز بارش شروع تھی ڳئی ۔ میݙے میاں میکوں آکھن ہُݨ توں وی میݙی ماء وانگوں آکھ پئی ’’واہ ساݙی قسمت‘‘۔

سویر9/10وڄے تئیں تیز بارش ہووے ، اساں آکھیا اساں نی ونڄ سڳدے تیز مینہ ہے ۔ خیر ݙاہ وڄے تئیں مینہ رُکیا تاں اساں تیاری شروع کر ݙتی ۔ رَستے اِچ نجم بھئی کوں دُعا کرݨ ونڄݨاں ہا ، اَدھ گھنٹہ اِتھ ٻہہ تے اساں ڈھائی وڄے ملتان پُڄے ۔ تقریب شروع تھی ڳئی۔

تقریب دے بعد قیصرانی ہسپتال ڳیوسے اساݙی ہک کولیگ دا رکشے نال بُری طراحویں ایکسیڈ نٹ تھیا ہا ۔ ریسیپشن تے پتا چلیا جو شام انھاں کوں ڈسچارج کر ݙتا ڳیا ہا ، فون کیتا تاں اُنھاں آکھیا گھر آ ونڄو ۔ میں آکھیا بس مِس ہُݨ مغرب ہے سفر وی کرݨے اساں معذرت تہاݙی صحت کیتے دُعا ہر ویلھے کریندے ہِسے ۔ کینٹ اِچوں تھی تے 9وڄے رات اساں گھر آ ڳیوسے ۔ عثمان کِتی ݙینہ آہدے ریہے جو میݙی اماں وانگوں بارش اِچ کیویں آہدی ہانویں ’’واہ ساݙی قسمت‘‘۔

نائلہ بھابی میکوں ݙسایا جو میݙے پُتر منہاج کوں تہاݙے تلیئے ہوئے آلوٻہوں پسند ہِن جݙاں میں آلو تلاں منہاج آہدے’’ آپ کو آلو تلنا نہیںآتا، آنٹی زاہدہ کتنے اچھے آلو تلتی ہیں۔‘‘(تہاکوں آلو تلݨ نی آندا آنٹی زاہدہ چنگی آلو تلیندی اے)۔ میں کھل تے آکھیا چلو ایہ ڈگری میکوں منہاج ݙتی اے جو مَیں قابل ہاں۔

(سلیم بھئی وی جمیل بھئی کوں آہدے ہن زاہدہ دا پکیا ہویا آلو چکن کھائو بھئی جان ایویں لڳدے ٻہوں طاقت آ ڳئی ہے )

ساݙی ہک ٹیچر اپݨی دھی بارے ݙساوِن پئی ۔ عدن اپݨیں سہیلیں نال کھیݙدی ہے (عدن پنج سال دی ہوسی تقریباً) تاں پارلر بݨائی پئی ہوندی اے ۔ میک اپ کریندی اے سہیلیاں دا ، ہک ݙینہ میں کریم لاوݨ پئی ہاں اندھارا ہا پہلے میں آکھیے بیٹے احمد کوں لا گھناں وَت آپ لیساں ۔ احمد کوں لئی اے تاں میں آہدی آں ، سانولا کیوں لڳداپئے ۔ وَل میں خود لئی اے تاں میں اپݨے آپ کوں سانولی لڳی ۔ مَیں آکھیئے روشنی اَتے کریم ݙیکھاں تاں سہی کیا ہے ۔ میکوں نیلی لڳی اے تاں میکوں بیٹے احمد نے ݙسایا امی عدن پارلر بݨائی پئی ہئی تاں کریم اِچ نیل رَلا ݙتس۔

ایویں ہک ٻئی مس ݙسایا میݙے پُتر سویرے سکول ونڄݨ ویلھے میکوں آکھیا امّی لوشن تاں ݙسو کتھاں اے ، میں روٹی پکیندی پئی ہَم میں آکھیا الماری اِچ لاتھے چا گھن ۔ اوں منہ کوں لاتے تولیہ نال منہ صاف کیتا اَتے سکول ڳیا پیا میں سکول آوݨ کنوں پہلے ہتھ دھو تے تولیہ چاواں تاں او تیل لڳے ’’بُو جھیں وی آوے الماری کھول تے ݙٹھی تاں لوشن تاں اتھاں ناں ہا البتہ مشن آلہ تیل لاتھا ہا میکوں سمجھ آ ڳئی جو میݙا پتر مشین آلے تیل کوں لوشن سمجھ تے لا ڳئے تاں میکوں کِھل آ ڳئی۔

ایویں میݙی چھوٹی نناݨ کنوں اوندی سہیلی پُچھیا ۔ ایہ چار کریماں لوک لیندے چٹا تھی ویندے تیکوں پتا ہے اتھاں دے ناواں دا میکوں ݙس ، میں وی لیساں او آہدی اے میں ترائے تاں اوں کوں کریماں ݙسایاں چوتھی آکھیا چیری بلاسم ملا تے رات کوں منہ کوں مار سُمیں اوں شودی گھن تے مکس کیتیاں چار کریماں لاتے سُتی۔ سویرے اُٹھی تاں منہ دھوتا تاں چیری بلاسم لہݨ اِچ نہ آوے ۔ مشکل نال لہائی ۔ میݙی نناݨ کوں آ تے سُݨایا تاں اوندی بے وقوفی اُتے کِھل کِھل ٻݙی پئی ہووے ۔

امریکہ اِچوں بھتریجی سارہ بی بی اپݨی دھی دعا نال آئی ، گرمیاں اِچ (دعا دی عمر تقریباً ترائے ساڈھے ترائے سال ہوسی) میݙے گھر سارہ اَتے دعا آئیاں ، نال خلیل بھئی اَتے بھتریجے احمد شجاع ہاشمی دا بیٹا احمد تقی ہاشمی جیندی عمر تقریباً ڈھئی سال ہئی اَئے ۔ میݙے گھر آ تے ٻیٹھے تاں سارہ بی بی دُعا کنوں پُچھیا ، دُعا پھپھو کہاں ہیں اوں میݙو اشارہ کیتا جو ایہ ہے ۔ تھوڑی دیر بعد دعا میݙو اشارہ کر تے آہدی اے "Taqi,s Phuphu"تقی دی پھوپھو۔

خلیل بھئی (اپݨے نانا) دو اشارہ کر تے آہدی اے "Dua,s BaBa" دعا دے ابو

ماء اوندی آکھیا نہیں بیٹا آپ کی بھی پھپھو ہیں (نہ پُتر تیݙی وی پھپھو ہے اے) اوں چنگھ تے ولا اونویں آکھیا Taqi,s Phupho تقی کی بواء اَتے

Dua,s BaBaدُعا دے ابو۔ سارے کھل پئے جو ایہ اپݨا سبق نی بُھلدی ۔ ایہ او پڑھسی جو ایندے دِل اِچ اے۔

کجھ ݙینہ پہلے سارہ بی بی دا امریکہ اِچوں فون آیا تاں سارہ بی بی آکھیا دُعا آئو پھپھو سے بات کرو۔ا(دُعا آ بواء نال ڳالھ کر)

تاں اوں ولا ایہو کجھ دہرایا Taqi,s Phupho(تقی دی بوائ؟)

میں آکھیا نی مَیں آپ کی پھپھو ہوں (نا مَیں تیݙی بواء ہاں) آکھݨ لڳی

No Taqi,s Phupho(نہ تقی کی پھپھو)نہ تقی دی بواء

میکوں کِھل آ ڳئی مَیں آکھیا توں بیٹا اپݨی ڳالھ امریکہ ونڄ تے وی نی بُھلی تیکوں ایہ ڳالھ یاد رہسی۔

جمیل ہاشمی صاحب دا چھوٹا پُتر حمزہ علی ہاشمی کوں جئیں ویلھے آکھوں بیٹا کھاݨا کھائو (روٹی کھائو) یا کوئی فروٹ کھائو او جواب ݙیندے کھادی آو ۔ ہک ݙینہ فیس بک تے اُوں اپݨے دوستاں نال کھاݨا کھاوݨ دی ہوٹل دی تصویر لائی ۔ میں میسج کیتا حمزہ ! کھادی آئو اُوں جواب ݙتا ’ ہا ہا ‘۔

حوالہ

کتاب: رَلے پندھ کریسوں ، مصنّف: زاہدہ اجمل ہاشمی، چھاپہ خانہ : جھوک پرنٹرز ملتان