وانڈھے وَدّے نیں جھانولا چئی
جیویں اساں کلھ لکھیا ہا جو اساں ’’جھوک‘‘ اِچ ٻہوں کجھ چھاپݨ چہندوں ۔ پَر مجبوری ایہ ہے جو ݙوں وَرقیں تے چار صفحیں آلی اخبار اِچ کیا کیا چھاپوں ۔ انگریزی تے اُردو آلیں وݙیں اخباریں اِچ ٻٹ کڑاک آلیاں کئی خبراں ایجھیاں ہوندین جو پڑھ تے زوریںمسئیں کِھل آ ویندی اے ‘ ایہے سبھے خبراں اُونویں دیاں اونویں ’’جھوک‘‘ اِچ چھاپوں تاں ٻیاںتاں ٻیاں خبراں نِسے چھاپ سڳدے ۔ جھا جو کائنی ہوندی ہِیں واسطے اساں اے سوچیئے جو چسولیاں ‘ مرکڑیاں اَتے سوادی خبارں کݙاہیں کݙاہیں ٻٹ کڑاک اِچ ݙیندے رہسوں ۔ چرھپ تے وات سلوݨاں کرݨ کیتے تھوڑے جیہے تھوم دھانڑیں تے لوݨ مرچاں آپوں وی رَلا گھندے رہسوں ۔ دُھنگاری لاوݨ سواد ودھاوݨ دی خاطر ۔
ہک اخبار اِچ خبر چھپی اے جو پنجاب دے ’’لوہا لاٹ‘‘ میاں نواز شریف آئی جے آئی دی طرفوں الیکشن دیاں ٹِکٹاں ونڈیندیں ہوئیں ’’لہور‘‘ دی سیٹیں اِچوں 5سیٹیں تے ’’میاں‘‘ کھڑے کیتن۔ حلقہ 93میاں احسان الحق ‘ حلقہ 94میاں عمر حیات ‘ حلقہ 95میاںنواز شریف ‘ حلقہ 96میاں شہباز شریف تے حلقہ 98کنوں میاں عثمان۔
پاکستان نواں نواں بݨیا ہا ‘ پنجاب اِچ میاں ممتاز محمد خان دولتانے دی حکومت ہئی ۔ میاں دولتانہ سیاست اِچ ’’سڄی کھٻی‘‘ مارݨ اِچ مشہور ہَن ۔ لہور اِچ پہلامارشل لاء اُنہائیں دی مہربانی نال لڳا ہا ۔ حسین شہید سہروردی اُنہیں ݙیہاڑیں اپوزیشن دے لیڈر ہوندے ہَن ۔ میاں ممتازدولتانہ دے ’’لَکھݨ‘‘ ݙہدے ہوئیں اُنہیں ہک واری آکھیا ہا جو ’’پنجاب کے میائوں سے مجھے ڈر لگتا ہے ۔ شودے سہروردی مرحوم کوں تاں پنجاب دے ہک میاں پٹوا گھتیا ہا ۔ ہُݨ تاں سارا پنجاب تے خاص طور تے ’’لہور‘‘ میاں صاحبان دی وَٹھ اِچ ہا ۔ پنجاب دا گورنر وی ہک ’’میاں‘‘ اے ۔ میاں محمداظہر اوہو ٹِکھیا ہا نانی ویڑھا تے چُلھ وکیڑا ۔ سہروردی صاحب جیندے ہوون ہا تاں ݙیکھن ہا جو وݙے میاں صاحب تاں جو ہِن ۔ نویں سَماوݨ آلے چھوٹے میاں وِیہہ وَڄا ݙکھائین۔ خلقت خدا دی ’’اویھ‘‘ دے وات اے۔
خبر چھپی اے جو کوٹ رادھا کشن دے ہک بندے حاجی نور محمد کمبوہ پنجاب اسمبلی دی سیٹ 148دے سبھنیں ’’امیدواریں‘‘ کوں چِتائے جو او اپݨی ’’برادری‘‘ تے یاریں ‘ دوستیں دے ݙوں …… ووٹ ہوں اُمیدوار کوں ݙیسے جیرھا اوندی شادی کرویسے ۔ حاجی نور محمد کمبوہ آکھیئے جو اوندی گھر آلی کوں رضا تھیں ہوئیں 3مہینے تھی ڳن۔ او اپݨے ہتھیں نال روٹیاں پکا پکا تے کک تھی ڳے ۔ حاجی صاحب ’’شرط‘‘ تاں واہ جو رکھی اے۔
نظردی اینویں پئی اے جو اَڳے پِچھے سنگراند پیپلز پارٹی دے ’’امیدوار‘‘ تے ٻاہسے ’’روٹی ‘ کپڑا ‘ مکان‘‘ ݙیوݨ دی ڳالھ کریندن تاں ’’رَن‘‘ روِڳڑی دا بندوبست اِی کرن‘ جے حاجی نور محمد کمبوہ دی ’’رِیس پریسی‘‘ قومی تے صوبائی اسمبلی دے ہر حلقے اِچ اُتھائوں دے وانڈھے تے ’’ٻے واہے‘‘ کنوارے ‘ اپݨی ’’سِیٹ‘‘ دے اُمیدواریں کنوں ایہا شرط منواوݨ کیتے ہک ’’صلاح‘‘ تے ہک مُٹھ تھی ڳے تاں اُمیدواریں کوں آ بھوڳ ویسے‘ اُنھیں کوں انتخابی دفتریں دے نال نال شادی دے دفتر وی کھولݨے پوسِن۔
ہک ٻے کنوں ودھیک ووٹ گھنݨ دی خاطر ’’اُمیدواریں‘‘ دا آپت اِچ ’’مقابلہ‘‘ تھی ڳیا تاں وَل ٻی چس آئوسے ۔ شادی کرݨ دے خواہشمند ’’وانڈھے‘‘ تے کنوارے ’’وݙیریں‘‘ کوں ۔ ہَر امیدوار ‘ آپ ݙے چھیکسے جیرھے وانڈھے تے کنوارے ۔ نال جتنے ودھیک ووٹر ’’ہوسِن اُنہیں دی ٻنھائیں کنوں ودھ تے آدر بھاہ تھیسے۔
حوالہ
[لکھو | ماخذ وچ تبدیلی کرو]ٻٹ کڑاک، مصنف: انیس دین پوری۔ ناشر: جھوک پبلشرز ملتان