واحد علوی (مرحوم)

واحد علوی 1948ء کوں ملک اللہ بخش دے گھر ڈیرہ غازی خان اچ پیدا تھئے ۔میٹرک تک تعلیم حاصل کیتی،پی ٹی سی کرکے درس و تدریس دا پیشہ اختیار کر گھدا۔ 1978ء اچ شاعری دا شوق تھیا تاں نامور شاعر سعید احمد راشد توں اصلاح گھدی تے سرائیکی شاعری دیاں تقریباََ تمام اصناف اچ طبع آزمائی کیتی۔ مگر ڈوہڑہ تے غزل انہاں دیاں پسندیدہ اصناف ہن ۔بطور نمونہ ہک غزل ملاحظہ فرماؤ!

(غزل)

نویں سجھ کوں نماشاں تئیں ساڈے ساہ دے سہارے ہن

اساں  ٹرنے توڑے پیریں تلے  بکھدے انگارے ہن

متاں دھرتی اُتے روہ دا پچھانواں رات کر ڈیوے

ساڈی  پلکیں اُتے رستہ ڈسن کیتے ستارے  ہن

اساں تاں چندر پالئے ہن ، اساں تارے کھڈالئے ہن

ساڈے اپنے پچھانویں کیوں بدن ساڈے توں بارے ہن

ساڈے سینے  سمندر  وچ کروڑاں ہا  جزیرے  ہن

کہیں جاہ سوجھلے ہوندن، کہیں جاہ گھُپ اندھارے ہن

اساں چُپ چاپ وہندے ہیں بدن دے وہن وچ واحد ؔ

اساں جیکر پلٹ پووں تاں  بُڈ  ویندے کنارے ہن