واجد تھلوی

اصل ناں    واجد علی 

قلمی ناں     واجدؔ تھلوی    

جمن         1990ء    

تعلیم         بی اے

پیشہ          جٹاکی  

فون نمبر       03467084245

جاہ پتہ        ڈیرہ تھلوی چاہ باقر والا تلائی نور شاہ غربی تحصیل کوٹ ادو(مظفر گڑھ)

واجدؔ تھلوی نور شاہ تلائی (تھل) دا  اُبھردا ہویا موزوں طبع نوجوان شاعر ہے ۔فنِّ شاعری دے تمام تر رموز تے قواعد و ضوابط باریکی نال سمجھدے ۔سرائیکی شاعری دیاں تمام مروّجہ اصناف تے طبع آزمائی کریندا پئے۔اپنی ادبی تنظیم ’’بزمِ فیض بلوچ‘‘ دا جنرل سیکر ٹری تے روحِ رواں ہے ،میکوں اپنے ایں متحرک ،سعادت مند شاگرد تے بہوں فخر ہے ۔2010ء وچ آون آلی تباہ کُن چھل دے حوالے نال واجدؔ تھلوی مختلف شعراء دے المیہ کلام تے مشتمل 64صفحیاں دا مجموعہ مرتب کر کے ’’چھل دیاں چھولیاں‘‘ دے عنوان نال شائع کیتا ،تے ایویں 2015ء اچ صرف اپنی بزم دے اراکین 10شعراء دا کلام وی مرتب کر کے ’’پھُلّاں دی جھُل ‘‘دے عنوان نال شائع کر چکے تے ہُن اپناں ذاتی شعری مجموعہ’’چُنّی‘‘دے عنوان نال کمپوز کریندا پئے ،جیڑھا جو عنقریب منظرِ عام تے آویسی۔انشاء اللہ۔

جتھوں تک واجدؔ تھلوی دی شخصیت دا تعلق ہے تاں شرفِ انسانی دیاں تمام تر خوبیاں ایندے وچ موجود ہن،مؤدب،مہذب،ملنسار،تے خوش اخلاق نوجوان ہے۔ایہا ای وجہ ہے جو ہر کوئی ایندی شرافت دا اعتراف کریندے۔

نمونہ کلام

مولود شریف

مولود شریف

کلام:   :واجدؔ تھلوی

ربیع الاول دی بٖارھاں  دا  ڈٖیہنہ  آیا  ہے

جشن ِ  میلاد  اساں  رجٖ   کے  منایا  ہے

کیتی    ایہا   جبرائیل   آ    منادی  ہے

دنیا  تے  اجٖ  مٹھے  مدنی  دی  شادی  ہے

جھنڈا  جبریل  چھت کعبے دی تے  لایا ہے

جشن ِ  میلاد  اساں  رجٖ   کے  منایا  ہے

دنیا  تے  آیا  جڈٖا ں  صادق   امین  ہے

امت  دی   خاطر  جھکائی  چا  جبین  ہے

جٖمدیو  نہ   امت  کوں  مدنی  بھلایا  ہے

جشن ِ  میلاد  اساں  رجٖ   کے  منایا  ہے

انبیاء   دیدار  کیتے  آئے  جو  تمام  ہِن

قدسی  وی  آئے  کُل  پڑھنْ  سلام  ہِن

سہرا  جیندی  آمِد دا  حوراں  نے سُنْایا ہے

جشن ِ  میلاد  اساں  رجٖ   کے  منایا  ہے

سوہنْاں بٖہوں سوہنْاں بی بی آمنہ دا چن ہے

چن  نال کھیڈنْ  دا  جٖانْدا   جو  فن  ہے

اُنگل  ہلا  کے  آقا  چن  کوں گھمایا  ہے

جشن ِ  میلاد  اساں  رجٖ   کے  منایا  ہے

مُکی  اجٖ  دنیا  توں  ساری  ظلمات  ہے

روشن  نظردی  اے  واجد  ؔ کائنات  ہے

گھر   عبداللہ  دے   جو   نور  سما یا  ہے

جشن ِ  میلاد  اساں  رجٖ   کے  منایا  ہے

مسدس

جہڑی ڳئی ہئی پھیل معاشرےوچ بدصورت حالت دورتھئی

ہا ہر کئی عرق اچ غرق ہوندا۔۔۔۔۔۔۔او مرض علالت دور تھئی

او وحشت زور ورائی والی۔۔۔۔۔۔۔۔۔بے سود خجالت دور تھئی

انسان انسان دا دشمن ہا۔۔۔۔۔۔۔۔۔۔۔۔۔اے رسم جہالت دور تھئی

،

میݙے پاک محمد خلقت کوں۔۔۔۔۔۔۔۔۔۔آ روشن راہ ݙکھلائی ہے

کائنات اچ واجد راہوݨ دی۔۔۔۔۔۔۔۔۔۔۔۔۔۔تہذیب آقا سکھلائی ہے

۔۔(واجد تھلوی)

غزل

دھوئیں دار  فقیر   ہیں  اساں

کڈاں یار   امیر  ہیں  اساں

سینے  تے  نت ہَل  پئے  واہندن

دردیں دی جاگیر ہیں اساں

باہروں ڈسدے رنگ دے کالے

اندروں  چِٹے  کھیر  ہیں اساں

’’میں‘‘ ساکوں بس  چئی ودی  ہے

سَہہ نہ  سگدے  چیر ہیں  اساں

اپنے  آپ  کوں پر  کھیئے  واجدؔ

اپنے آپ  دے  پیر ہیں  اساں