نیل کتھا

کتاب دی اشاعت دا اَہر شاہدہ عارف قریشی تے قیادت حسین قریشی نے کیتے ۔ پس ورق تے رفعت عباس دا تبصرہ موجود ہے ۔ کتاب وچ 94کافیاں ،5قطعے تے16شعر موجود ہن ۔ 77کافیاں غزل دی طرح 2مصرعیاں والی ہئیت وچ ہن تے باقی 17کافیاں مثلث مربع ، مخمس والی فارم وچ ہن ۔ کافیاں دا رنگ ویدانت ، تصوف دا حامل ہے ۔ ماضی وچ سرائیکی وسیب وچ تھیندی دہاڑیل حملہ آوریں دے خلاف بغاوت ، عظیم ماضی دیاں کردیاں بُھردیاں ثقافتی تے تہذیبی علامتاں تے نیل وادی وچ نیل دی کاشت تے نیل دا استعارہ ورتیندی اے شاعری انوکھڑی ڄاپدی ہے۔

احسان احمد اعواݨ لکھدن:

’’پروفیسر شمیم عارف قریشی دی کتاب ’’نیل کتھا چھاپݨ دا اعزاز سئیں ظہور احمد دھریجہ کوں حاصل تھئے ، انہاندے ڈھیر سارے کارنامیاں وچ اے وی ہک کارنامہ ہے جواو دوستاں کوں کتاب آلے پاسے راغب کریندن تے انہاں کوں صاحبِ کتاب بݨا ݙیندن‘‘۔(70)

’’اُردو میں سرائیکی زبان کے اَن مٹ نقوش‘‘:

تحقیق و تنقید تے مبنی پروفیسر شوکت مغل دی کتاب ’’اُردو میں سرائیکی زبان کے اَن مٹ نقوش‘‘2008ء وچ جھوک پبلشرز ملتان دی طرفوں شائع تھئی ۔پہلی واری 1990ء وچ اے کتاب سرائیکی ادبی بورڈ ملتان نے شائع کیتی ۔

پروفیسر ڈاکٹر مقبول حسن گیلانی لکھدن جو :

’’ اپݨی نوعیت دی ہک بہترین تے شاندار کتاب اے۔ایں کتاب وچ اُردو دے کلاسیکی ادب وچوں سرائیکی زبان دے نقش تلاش کیتے ڳن ۔ دِلی دے کلام دیوانِ درد ، دیوان میر ، مثنوی سحر البیان ، دیوانِ غالب ، غالب دے خطوط تے مولوی نذیر احمد دی نثر نگاری وچوں گھدے ڳئے ۔ محاورے تے اَکھاݨ شامل ہن۔ادارہ جھوک کوں ایں کتاب دی جتنی مبارک باد ݙتی ونڄے گھٹ اے۔‘‘

حوالہ

ظہور احمد دھریجہ دی سرائیکی ادبی خدمات دا جائزہ (مقالہ نگار: شائستہ ظہور،بہاء الدین زکریا یونیورسٹی ملتان)  نگران مقالہ: ڈاکٹر محمد ممتاز خان کلیانی