نہ پرائی لوئی کوں ہَتھ لا…

اللہ خیر گزارے ‘ وزیراعظم میاں نواز شریف تے مشہور فلم ایکٹریس ریما ہوریں کوڑیج ڳن کتھائیں ایہ نہ سمجھ ٻہائے جو آپت اِچ کوڑیج ڳن ۔ آپت اِچ کوڑیجن ہا تاں اسیکوں تُسیکوں تے سارے جڳ کوں پتہ نہ لڳے ہا چھڑا انہیں دے فلمیں وزیر شیخ رشید کوں علم ہووے ہا ‘ سُݨیج ایہا اے جو رُٹھے مناوݨ تے وِچھڑے مِلاوَݨ دے مُنڈھ لا کنوں کاریگر اِن ۔اونویں وی میاں نواز شریف تے ریما دے کوڑیجݨ تے آپت اِچ رُسیمے آلی ڳالھ پَھونی کھمدی میاں نواز شریف ہوریں ایجھے ڳالھے تھوڑے اِن جو جام معشوق علی تے چڑھتی کر تے سندھ‘ پنجاب دے ڳانڈھے وِگڑیسن‘ او وی ریت دی مُٹھ بَھر تے اصل اِچ ڳالھ ایہ بݨی اے جو وزیراعظم تے ریما کوں شودے نبھا ڳے اخباریں آلے تے ہِکے ویلھے کاوڑ چڑھی اے ۔ وَل چس ایہ ہے جو اُنہیں ݙوہیں اَپݨی کاوڑ کڈھی وی اخباریں آلیں دے اڳوں ایں جنہیں خبراں جوڑ بݨا وَݙیں وَݙیں سُرخیں نال چھاپ چھوڑین ایئیں آکھو اسیکوں ‘تُسیکوں تے اخباراں آلیں تے زِھ تھئے ہوئے ہِن۔

وزیراعظم ہوریں لہور اِچ اخبار آلیں نال ڳالھ مہاڑ کریندیں ہوئیں آکھیئے جو مَیں اخبار آلیں کوں کیا آکھاں؟ جو کجھ اَکھیساں او اوہو کجھ لِکھ ݙیسن؟ اُنہیں آکھیا شالا او ویلھا نہ آوے جو میکوں قوم کوں آکھݨاں پوّے جو او اخبار آلیں دا حق حساب گھنے‘ پر نظردی اینویں پئی اے جو قوم انہیں کنوں پُچھ پرتیت ضرور کریسے۔

وزیر اعظم اخبار آلیں نال ایں ڳالھوں وی کاوڑیے ہوئے ہَن جواُنہائیں دے آکھݨ موجب اُنہیں سیاسی جماعتیں دیاں خبراں وی موٹیں موٹیں سُرخیں نال چھپیندن‘جنہیں نال چھڑے 4بندے اِن ۔ وزیراعظم ہوریں اپݨی جھاہ تے سچے اِن اُنہیں کوں تاں ’’ݙکھیں مَار قریشی کیتے۔ مطلب ایہ ہے جواو تقدیریں سیاست اِچ آئن نتاں جیئیں جمعیت علماء پاکستان دے صدر مولانا شاہ احمد نورانی ہوریںآکھیئے جو ’’میاں صاحبان سیاسی لوگ نہیں ہیں‘‘۔ اَتے ہِے وی اینویں ایہ تاں تھورا مَنِن جرنیلیں دا جنہیں انہیں کوں پنجاب دا وزیر خزانہ ‘ وزیر اعلیٰ اَتے وَل چھیکڑ باقی ملک دا وزیراعظم بݨائے ‘ جے ایہ سیاستدان ہووِن ہا تاں ایجھیاں ڳالھیں اصولوں نہ کرن ہا‘ جیجھیاں ݙینھ رات کریندے وَدِن ۔ سیاست دی الف ‘ ب ڄاݨدے ہوون ہا اَتے سیاست دا دِریا اپݨیں ٻانہیں تر تے پتݨ تے پُڄن ہا تاں وَل ملک دا ایہ حال نہ ہووے ہا ‘ جیرھا اَڄ کلھ اے جو نِکا وݙا اَک نک تے ناسیں تار اے ‘ سیاستدان ہووِن ہا تاں اُنہیں کوں ایں ڳالھ دا وی علم ہووے ہا جو قوم کیندے آکھیئے اِچ اے؟ کیندے کھادے پیتے تے کیندی لُٹ پُھر دا لیکھا چوکھا جوڑ پُچھ پرتیت کرݨ کیتے سنبھری کھڑی اے۔

وزیر اعظم آنگے ریما وی چسولیاں تے سوادی ڳالھیں کیتبن اُوں آکھیئے جو ہِیں کھوٹے زمانے اِچ وی قلم دی عزت و آبرو تے پت رکھݨ آلے اخبارنویس ہِن پے پر او ڳنتری اِچ ٻہوں گھٹ اِن ‘ انڳلیں دے ݙوݙیں تے ڳݨیجݨ جوڳے ‘ اَٹے اِچ لُوݨ آنگے ‘ فِلم ایکٹریں اَتے فلم ایکٹریسس دے عیب ڳولݨ اِچ لڳے رہندن ‘ وَل اُنہیں کوں چِتا تے ہنیں کنوں مونہہ منگی ’’موکھ‘‘ مہݨیندِن وِتھ وِتھ تے ڳالھ ڳالھ تے بلیک میل کریندن جیرھا اُنہیں کوں کِلّے پَٹائی تے کنڈے پوائی نہ ݙیوے بھونگہ نہ بھرے ایہ اپݨے اخباریں اِچ اُوندے بارے اینویں اَڄائی دے لِے لیندِن ۔ اوندے بَرخلاف کوڑے دود ٻدھ تے اُونکوں بدنام کریندن ۔ ریما ݙکھ کڈھیے جو ایجھے لُڈھ اخبار آلے تاں میݙے پچھوں پئے ہوئے ہَن ‘ نحق دی ڳنڈھ تروپ کر تے بدنامیاں لئی رہندن ۔

اُوں آکھیئے جو مَیں شادی کریساں‘ شادی کر تے اپݨی پڑھائی پوری کر تے وَل ہک اخبار کڈھ تے انہیں سبھنائیں دی ناڑی ݙیکھساں ۔ حق نحق بارے رَبّ ڄاݨے پر ایہ پک اے جو وزیراعظم ہوریں تے ریما ہوریں اخبار آلیں نال کاوڑئیے ہوئے ہِن ۔ اللہ ڄاݨے کیا بݨسے ۔

پر اسیݙا کیا اساں تاں ہِل نہ کُکِڑ ‘ وݙے شہریں آلے وݙے اخبار آلے ڄاݨن ۔

سیاݨے آکھ ڳن ! نہ پرائی لوئی کوں ہتھ لا ‘نہ اپݨا پٹ پَھڑوا

منگل2؍جو ن1992ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان