نہ تاں او ایجھے کݙاں

پاکستان ‘ ہندوستان‘ بنگلہ دیش اَتے دنیا دے ایہو جیہے ٻے ملکیں اِچ سیاستدانیں ‘ لیڈریں اَتے سیاسی ورکریں کیتے ڈھکیجݨ ‘ جیل وَنڄݨ کوئی نویں ڳالھ کائنی ‘ ایہ ہک پُراݨی رِیت اے ‘ سیاسی لیڈریں تے وَرکریں دا ڈھکیج وَنڄݨ ہنائیں کیتے وݙا مَاݨ ہوندے ‘ فخر اَتے وَݙائی دا موجب ہوندے‘ اَڳے تاں ایئیں ہوندا ہا جو عوام دے مَنّے مَنائے لیڈریں دی یا ریل اِچ گزردی ہئی‘ یا جیل اِچ اَتے جیرھے چَھڑے ناں دے لیڈر کینھاں ہوندے ہَن او جیل اِچ ٻہہ کراہیں تے اَپݨی سوچ ‘ اَپݨے علم ‘ اَپݨے تجربے تے اَپݨی پارٹی دے پروگرام موجب عوام کوں دَڳ لیندے ہَن ‘ حق سچ دی راہ تے جیل وَنڄݨ ‘ سُنتِ یوسفی‘ وی ڳݨیندی اے ‘ اسلام تے مسلمانیں دی تاریخ ݙسیندی اے ‘جو امام ابوحنیفہ ‘ امام ابو حنبل ‘ حضرت مجدد الف ثانی اَتے ہُنائیں آنگے ٻنہائیں اَݨ ڳیݨویں ‘ عالمیں جیلاں بھوڳیاں ہَن ‘ دنیا دی تاریخ ایں ڳالھ دی وی گواہی ݙیندی اے ‘جو سقراط ‘ گلیلیو ‘ والٹیئر تے اِنہائیں جیہے ٻہوں سارے سُدھ سُرت آلے سیاݨے بندیں کوں وی جیل وَنڄݨاں پیا ہا ‘ اَتے ایہ وی ہِک مَنّی مَنائی ڳالھ اے جو جیل وَنڄݨ آلے ایجھے وݙے لوکیں کتاباں لکھ کراہیں ’’علم‘ادب‘ شاعری ‘ فلسفہ ‘ سائنس تے سیاست دے راہیں تے سوجھلا کیتا ۔ مولانا عبدابوالکلام آزاد رانچی جیل اِچ ٻہہ تے ’’غبار خاطر‘‘ جیہی کتاب لکھی ۔ شیخ ایاز ‘ فیض ‘ حبیب جالب ‘ احمد ندیم قاسمی جہے شاعریں جیل اِچ یاد گیری آلیاں غزلاں‘ نظماں لکھیاں ‘ اخبار نویسیں اِچوں مولانا ظفر علی خان ‘ مولانا عبدالمجید سالک ‘ مولانا محمد علی جوہر ‘ شورش کاشمیری ‘ حمید اختر اَتے سبط حسن ہوریں لِکھتاں لِکھ تے سُدھ سُرت دے ݙیوے ٻالیئے۔

وَل ایہ وی ہے جو ’’جیلیں‘‘ اساں کنوں شہید حسن ناصر‘ شہید ذوالفقار علی بھٹو اَتے شہید نذیر عباسی جیہے لعل وی کھیسے ہِن اَتے جنوبی افریقہ آلیں کوں نیلسن منڈیلا ‘ جیہے لیڈر وی ݙتِن‘ جئیں اَپݨی حیاتی دے ستاوی وِرہیوں جیل دی ہکو کوٹھڑی اِچ گزار ݙتے ‘ اَپݨے پاسے سیاست آلے کھاتے اِچ ڈھکیجݨ تے جیلاں بھوڳݨ دے لیکھے خان عبدالغفار خان بہشتی ‘ خان عبدالولی خان ‘ سئیںجی ایم سید ‘ میر غوث بخش بزنجو بہشتی ‘ عبدالصمد خان اچکزئی بہشتی اَتے ڄام ساقی جیہے سیاسی لیڈریں تے ورکریں دا نمبر اے ‘ ایں لیکھے مسلم لیگی ماریے طاق ہِن ‘ جیئیں حبیب جالب ‘ خان قیوم دے بارے آکھیا ہا:

سامنے جیل ہو تو اُوئی اَللہ

اور مسند پہ مَاجھے گامے ہیں

اَڄ آلی ہڑتال سانگے جیرھے مارکہ ’’جھلیج‘‘ ڳن ہُنائیں کوں ہُنائیں دے لیڈر بھنوا گھتیے نہ تاں او ایجھے کݙاں۔

ٻدھ12اکتوبر1994ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان