نِت کُرلاوے کونج

1950ء دے دور دی عکاسی کریندا اے ناول دیہاتی تے وسیبی پس منظر وچ لکھیا ڳئے ۔ غربت تے جہالت پاروں عورتاں دے مسائل تے اُنہاندی روز ݙیہاڑی دی حیاتی دی عکاسی کریندے جو غربت توں تنگ تھی کے عورت کیویں بُرائی وَل ٹُر پوندی ہے ۔ بے ساختگی تے ٹھیٹھ الفاظ ناول دی چس رس ودھا ݙتی ہے ۔ اَتے اے ناول 17ابواب تے مشتمل ہے ۔ ناول دے اہم کردار زیبو ، جنتی ، فراز تے ماسی ڳاونہر ہن۔

کتاب دے بیک پیپر دے ظہور دھریجہ لکھدن:

’’میں اے آکھݨ چہنداں جو جیویں دیرے آلئیں کوں اپݨے وطن وسیب نال محبت اے ، اپݨے وسیب دے لوکیں نال محبت اے ایویں انہاں نال اساکوں وی دیرے نال محبت اے ، اساں اپݨے ساہ ساہ نال ’’اپݨے پُھلیں دے سہرے‘‘ محبت بھری خوشبو محسوس کریندوں۔ اے ٻئی ڳالھ ہے جو اساݙے وطن تے غیریں قبضہ کیتا ہوئے ، اساݙے سارے وطن کوں سارے دھرتی واسیں سانگے ’’قید خانہ‘‘ بݨا ݙتا ڳے،اساں قیدی تخت لہور تے تخت پشور دے سݙویندوں پر اساں قید خانیں دیاں کندھاں بھنیسوں ، اساں اپݨے نال اپݨے وطن وسیب کوں آزاد کرویسوں ، ظالمیں دی قید وچ جتنیاں ساݙیاں نسلاں ظلم دی چکی وچ پہیج ڳن ، اساں انہاندا حساب گھنسوں ، اساں ہک ہک ڄݨے تے بے موت ماریے ڳئے ، ہک ہک ٻال دے قتل دی ایف آئی آر ’’لوح وقت‘‘ تے درج کرا ݙتی اے ، اساں انگریز سامراج دے پٹھو قبضہ گیریں کوں آکھدوں جو او اساکوں حساب ݙیون تے اساݙے مقدس سرائیکی دیس دا قبضہ چھوڑ ݙیون ، نہ تاں اساں ظلم دی کالی رات تے اپݨے وطن دی آزادی سانگے بھڑسوں ، بھڑسوں او تئیں بھڑسوں جے تئیں دھرتی تے سرائیکی قوم دا ہک وی ٻچہ زندہ ہے‘‘۔

حوالہ

ظہور احمد دھریجہ دی سرائیکی ادبی خدمات دا جائزہ (مقالہ نگار: شائستہ ظہور،بہاء الدین زکریا یونیورسٹی ملتان)  نگران مقالہ: ڈاکٹر محمد ممتاز خان کلیانی