نُور پور تھل

ضلع خوشاب دا قصبہ تے تحصیل۔ نُور پور تھل کوں ’’تھل ‘‘ دا دل وی آکھیا ویندے۔ تھل دا علاقہ دریائے جہلم تے سندھ دے وِچکار ہے۔ ایں علاقہ ء ِچ پرے پرے تئیں ریت دے ٹیلے نظر اَمدن۔جئیں زمانے ء ِچ بادشاہ شاہجہاں نے نویں دہلی دی بنیاد رکھی ، ٹھیک اِیں زمانے ء ِچ روحانی بزرگ نور پور تھل دی بنیاد رکھی۔شروع ء ِچ اُنہا ں ہک کھوہ کھٹا تے آبادی دا مُنڈھ ٻدھیا۔اے کھوہ گورنمنٹ پرائمری سکول نمبر2دی عمارت دے تلے دٻیج ڳے ۔ تاریخی اعتبار نال اے علاقہ بنوں، لیہ، تے ملتان دے زیر اثر ہا۔ نُور پور تھل دے نیڑے موضع کاتیمار ء ِ چ ہک قلعے دے کھنڈرات موجود ہن۔ اے قلعہ نِکیاں سلہیں نا ل بݨیا ہویا ہے۔ ایں مقام توں شاہجہاں دَور دے سِکے وی برآمد تھئے۔

1745ء ء ِچ ٹوانہ سردار شیرخان نے نور پور دے علاقے تے قبضہ کر تے ایں قصبے دی از سر نو تعمیر کیتی۔اُوں اِتھاں ہک قلعہ وی قائم کیتا تے ایندے ء ِچ فوج دا ہک دستہ رکھیا۔ اِیݙے اُوݙے دے لوکیں کوں سݙا تے آباد کیا۔ وَل ایندے آسے پاسے نِکیاں نِکیاں آبادیاں قائم کر ݙتیاںتے اپݨے بھرا عالم شیر خان کوں نور پور دے لشکر دا سردار مقرر کر ݙتا۔1919ء دی ہک سرکاری رپورٹ دے مطابق اتھاں ڈسپنسری، ڈاکخانہ تے تھاݨہ موجود ہن۔ 26مئی 1923 کوں ایکوں سمال ٹائون کمیٹی دا درجہ ݙتا ڳیا۔ جݙاں جو 1960ء اچ یونین کونسل تے ٹائون کمیٹی دا درجہ ݙتا ڳیا۔ 1983ء ء ِچ نور پور تھل کوں ضلع خوشاب دے قیام دے ویلھے تحصیل دا درجہ ݙتا ڳیا۔

پُراݨے وقتیں ء ِچ اتھاں کھتری بھیݙیں دی اُن دی تجارت ٻہوں ہئی۔اے اُن ملتان تے ہندوستان دے وݙے وݙے شہراں ء ِچ پُجٖائی ویندی ہئی۔اتھاں دا خالص گھیو پشاور ، پنڈی امرتسر، ڈیرہ اسماعیل خان تے کراچی تئیں ویندا ہا۔صوفی بزرگ مصنف تے صحافی حاجی فضل احمد دا تعلق ہیں قصبے نال ہا۔ او 1906ء ء ِچ میاں ملوک علی دے گھر پیداتھئے۔ اتھاں سکول ء ِچ مدرس ریہے۔ بعد ء ِچ گورداسپور تے وَل لاہور چلے ڳے۔ پنجابی شاعر احمد فگار اتھاں دی شناخت ہن۔ او 1925ء ء ِچ پیدا تھئے۔ قصبہ سسی پنوں، رُٹھڑا ماہی تے فگار وابستہ انہاں دیاں تصانیف ہن۔ نور پور تھل دی آبادی 1981ء ء ِچ 2911تے 1998ء دی مردم شماری دے مطابق 5091 نفوس تے مشتمل ہئی ۔ ہُݨ ایندی آبادی 17ہزار دے نیڑے ہے۔