نوشہرہ

ضلع خوشاب دا قصبہ تے تحصیل ۔ ایکوں وادی سُون دے مرکزی قصبہ دی حیثیت حاصل ہے۔ اے علاقہ ماضی قدیم اچ بدھ مت دے زیر اثر ہا۔1888ء اچ نوشہرہ دے علاقے کھٹوائی دے مقام توں جیڑھا کتبہ ملیا ہا ایں توں ظاہر تھیندے جو اتھاں بُدھ مت دا وݙا زور ہا تے روڑا سدھا ایں پورے علاقے دا مذہبی پیشوا ہا۔ایں تاریخی کتبے تے جھاہ دا ناں ’’ناشیرا‘‘ لکھیا ہویا ہا۔ ایں بنیاد تے بعض محققین قیاس کریندن جو اے سُو ن سکیسر وادی دا قصبہ ’نوشہرہ‘‘ تھی سڳدے۔ اے کتبہ ملݨ دے مقام توں تقریباً 11کلو میٹر دے فاصلے تے ہے۔نوشہرہ دی وجہ تسمیہ اے ݙسائی ویندی اے جو ایں علاقہ اچ ٻیاں 9آبادیاں وی ہن۔ اتھاں آب رسانی کیتے تالاب وی ہا۔ عالی ہمت دی اولاداں لطیفال، مہرال، پھتیال تے ردھنال دے ناں نال مشہور تھیاں۔ سب خانداناں دے انج انج محلے قائم تھئے۔ ٻیاں خانداناں اچ جیڑھے ٻاہروں آ تے آباد تھئے۔ انہاں اچ مندیال ، سدال، گندوال، کھڑ تے بکھوال وغیرہ۔

1977ء اچ اتھاں کالج دا اجراء تھیا ۔ انگریزی پرائمری سکول 1934ء اچ بنڑیا جیڑھا 1960ء اچ ہائی تھی ڳیا ، اتھاں طلباء طالبات دے ہائی سکول، ہسپتال، تھانہ تے سول جج دی عدالت موجود ہے۔ نو شہرہ دی آبادی 1981ء ء ِچ 7078 تے 1998ء دی مردم شماری دے مطابق 8952نفوس تے مشتمل ہئی۔ ہُݨ ایندی آبادی یارہاں ہزار دے نیڑے ہے۔