نوشاہ سہریاں والیا
نو شاہ سہریاں والیا تیݙے سہرے ڳانوݨ آئیاں
بھاڳاں ولے دَرتیݙے تے بھاڳ جڳاوݨ آئیاں
وجٖن ڈھول خوشی دے وجٖن پئے وجٖن چندراݨیں
خوش تھی آکھن اے شرناہیں شالا سہرے ماݨیں
سوہݨاں گھوٹ سخی لجٖپالا ، ݙاتاں پانوݨ آئیاں
تیݙے دَر خوشبو رنگاں دے لتھے آن کچاوے
ساری میل ملاوڑی تیݙی آن دھمالاں پاوے
میں وی گھوٹ دے سہرے ڳا تے سڳن سہانوݨ آئیاں
تیݙے ویڑھے دے وچ آئیاں خوشیاں جوڑ قطاراں
رنگ برنگے ویس وَٹا کے لتھیاں آن بہاراں
لڳدے رُتاں سوہݨے گھوٹ کوں میندھی لانوݨ آئیاں
چار چفیروں لشکاں مارن بھاڳ سہاڳ دیاں چُنیاں
اَڄ تیݙے سبھ حُب داریاں دیاں دل دیاں آساں پُنیاں
خوشیاں نال ہندھیجن تیݙیاں ویلاں چانوݨ آئیاں
حوالہ
[لکھو | ماخذ وچ تبدیلی کرو]سرائیکی سہرے ، مرتب: شائستہ ظہور ، چھاپہ خانہ : جھوک پرنٹرز، ملتان