نور محمد کمتر
خواجہ شیخ نور محمد کمتر چشتی رحمت اللہ علیہ
(1910----------1968)
لکھت شفیق چشتی
---------------------------------------------------------------
دوستو!گھٹ ودھ تراے،ساڈھے تراے مہینے دی وتھی دے بعد آپڑیں علاقے دے کلاسیکی شاعراں دے تعارفی سلسلے "گنج ہاے گراں مایہ"(لعلنڑ لعل) وچ اج جیرھے شاعر تے خدا رسیدہ صوفی بزرگ دا تعارف تے چونڑویں کلام دی ونقی پیش پیا کرینداں انہاں دا سوہنڑاں ناں یے
خواجہ شیخ نور محمد چشتی کمتر رحمت اللہ علیہ
یاد رہوے جو اے تعارف نال چونڑویں کلام دی ونقی دے کہیں وی فورم تے ادبی حلقئیں نال آپ دی پہلی سونہہ سجانڑ ہے-امیدے تساں ہمیش آلی کار میڈے ایں پورھئیے کوں قدر دی نگاہ نال ڈیکھسو تے میڈا دل بدھویسو
اللہ پاک دی امان وچ راہوو
تہاڈا آپڑاں
محمد شفیق معین چشتی شیروی
جنرل سیکریٹری بزم_گل محمد چشتی و دبستان_شیرو(سرائیکی)
---------------------------------------------------------------
خواجہ شیخ نور محمد چشتی کمتر رح نے سن 1910 ء کوں وستی چشتیان(گد پور) موضع اتراء سندیلہ تحصیل جتوئی ضلع مظفرگڑھ وچ خواجہ احمد علی چشتی رح دے گھر وچ اکھ کھولی-آپ نے مڈل تئیں تعلیم "ماڑھا"شہر توں حاصل کیتی -آپ دا سارا گھرانہ علم،فضل تے فقیری وچ آپڑیں مثال آپ ہا-ایں سانگے آپ کوں منڈھلی دینی تعلیم سانگے کتھئیں پریں نہ ونجنڑاں پیا-ہا البتہ اگوہیں دینی تعلیم دے حاصل کرنڑ لئو آپ دے دیرہ غازی خان دے آرہوں بارہوں کہیں مدرسے وچ تعلیم پاونڑ دیاں روایتاں ضرور ملدئین-آپ نے خواجگان_تونسہ شریف وچوں حضرت خواجہ حافظ سدیدالدین سئیں رح دے دست_حق پرست تے بیعت کیتی-آپ عربی،فارسیی ،اردو تے سرائیکی دے قادرالکلام شاعر تھی گزرئین-آپ دیاں لکھتاں وچوں ڈو قلمی کتاباں "سفر نامہ_حجاز"تے "گل دستہ_نور"ہنڑ وی آپ دے جانشینیں کنیں محفوظ ہن پیاں-"سفر نامہ_حجاز"آپ دے ٹردئیں حج کرنڑ دے سفر دا حال ہے تے "گل دستہ_نور آپ دے چار زباناں وچ لکھئیے گئے کلام تے مشتمل مجموعہ ہے-آپ شریعت تے سنت تے سختی نال عمل کرنڑ الے بزرگ ہن-فرض و سنت نمازاں دی باقاعدہ ادئیگی دے نال نال اپ تہجد،چاشت،اشراق تے اوابین دے وی پکے پانبد ہن-ذکر_جہری کوں پسند فرمیندے ہن تے کثرت نال درود شریف کوں ورد_زبان رکھدے ہن-گھٹ الاونڑ،گھٹ کھاونڑ تے گھٹ سمنڑ اپ دا معمول ہا-جھک نوائی آپ دی طبیعت دا نشابر وصف ہا-باوجود ایندے کہ آپ نے وڈی محبت تے سک نال ٹردئیں بیت اللہ شریف دا حج کرنڑ دی سعادت حاصل کیتی ہئی ،آپ نے کڈہئوں آپڑیں ناں نال حاجی لکھوایا نہ سڈوایا بلکہ آپڑیں ذات سانگے "کمتر "دا لوظ پسند فرمیندے ہن-وستی چشتیاں کنوں کجھ عرصہ بعد لڈ کراہیں علی پور لگے گئے تے اتھاہیں آپ دا وصال سن 1968 ء کوں تھیا-علی پور وچ آپ دی نماز_جنازہ سید پناہ علی شاہ صاحب رحمت اللہ علیہ نے پڑھائی-ڈوجھی نماز_جنازہ آپ دے وڈے بھرا شیخ پیر بخش چشتی رح نے وستی چشتاں وچ پڑھائی تے اتھاہیں شیخ لعل والہ قبرستان وچ آپ کوں دفن کیتا گیا-آپ نے ڈو شادیاں کیتیاں ہن -پہلی گھر آلی وچوں آپ دا ہک پتر مولانا محمد اعجاز چشتی تے ہک دھی مئی جمئیے تے ڈوجھے گھر وچوں ڈو ہتر مولانا محمد سعید چشتی تے مولانا محمد حسن چشتی تھئے جیرھے ہنڑ پیر کالونی چوک شاہ عباس ملتان شریف دے وسینک ہن-
خواجہ شیخ نور محمد چشتی کمتر رح دی پیڑھی پوڑی خواجہ معین الحق الدین چشتی اجمیری حسن سنجری رحمت اللہ علیہ نال ونج ملدی ہے -
خواجہ شیخ نور محمد کمتر چشتی رح دے وڈ وڈیرئیں وچوں ڈو بھرا شیخ علی محمد(ساڑھی والہ)رح تے شیخ نیک محمد رح ضلع لاہور توں ٹر ضلع مظفرگڑھ دے قصبہ روہیلاں والی دے نال موضع عیسن والی ان پنے تے اتہاں وسدی کانہل قوم وچ رشتہ داری قائم کیتونے-انہاں دے لاہوروں ٹر عیسن والی آونڑ تے اتھاں رشتہ داری بنڑاونڑ دا واقعہ ایمان افروز کرامت تے مبنی ہے-کانہل قوم وچ رواج ہا کہ جیرھے ویلہے انہاں دی کئ بالڑی جوان تھی ویندی ہئی تے او اوندے مناسب رشتے لئو راہ نمائی حاصل کرنڑ کیتے اتھاں موجود ہک پیر دی مزار تے استخارہ کریندے ہوندے ہن تے ول انہاں کوں خواب وچ اے راہ نمائی مل ویندی ہئی-اینویں ای ہک کانہل دی بچی بلوغت دی عمر کوں پنی تے اونکوں استخارہ کرنڑ تے خواب وچ آگاہی تھئی کہ خمیس دے ڈینہہ ڈو انڑ سونہے جوان جنہاں وچوں ہک دے مونڈھے تے ساڑھی ہوسی تے نال ہک جھوٹ(کٹی)وی ہوسی،وستی دی مسیت وچ دیغر دی نماز ان پڑھسن تے انہاں وچوں جیرھا جوان تئیں کنیں آپڑیں امانت طلب کرے ہوندے نال آپڑیں دھی مئی دا نکاح کر ڈیویں-چنانچہ اینویں ای تھیا تے انہاں ڈو بھرانویں وچوں علی محمد(ساڑھی آلے)نال اوں بچی دا نکاح تھی گیا-کجھ عرصہ بعد علی محمد ساڑھی والے لاولد اللہ کوں پیارے تھی گئے تے اوں مئی نال انہاں دے بھرا شیخ نیک محمد رح نے شادی کر گھدی جنہاں وچوں ہک پتر محمد اسحاق جمیا-اوں مئی کوں وراثت وچ کجھ ایکڑ زمین ملی ہئی جیرھی اجنڑ تئیں ایں خاندان دی ملکیت وچ ہے پئی-ولا ایں کلاہنڑی مئی دے فوت تھیونڑ دے بعد شیخ نیک محمد رح نے نیڑے دے موضع ڈیڈھے لعل دے قریشی خاندان وچ شادی کیتی تے اتھوں انہاں کوں اللہ پاک نے چار پتر محمد احمد،محمد اسماعیل،محمد بخش تے محمد حسن عطا کیتے-ولا کئی ڈو پیڑھئیں بعد شیخ نیک محمد رح دی آل اولاد نے موضع اتراء سندیلہ(گد پور)دے مقامی زمینداریں دیاں بے آباد زمیناں برابر حصے دے حساب نال آباد کیتیاں تے ایں طرح کئی 20 ہک ایکڑ زمین حاصل کرکے اتھاں مستقل ٹکانڑاں بنڑایا تے انہاں دی ایں وسوں دا ناں وستی چشتیاں مشہور تھیا-