نور سلطان القادری

حضرت علامہ محمد نور سلطان القادری (ڄمݨ دی تریخ: 28 فروری 1942ء – وفات دی تریخ: 3 اکتوبر 2006ء) ہک جید عالم دین اتے صوفی بزرگ ہن جیہڑے حضرت سلطان باہو دی اولاد توں ہن۔ انہاں دی پیدائش 28 فروری 1942ء کوں ضلع ڈیرہ اسماعیل خان دی وستی جمعہ شریف وچ تھئی۔ چھ سال دی عمر وچ ماء دے انتقال دے بعد انہاں دی پرورش پیو، ممتاز صوفی بزرگ حضرت فقیر سلطان غلام باہو نے کیتی۔

انہاں نے 1958ء تک ابتدائی تعلیم حاصل کرݨ دے بعد جامعہ اسلامیہ عربیہ انوار العلوم ملتان وچ داخلہ ڳھدا اتے علامہ سید احمد سعید کاظمی سمیت ٻئے جید استاداں توں درس نظامی دی تعلیم مکمل کیتی۔ دوران تعلیم انہاں دے مضامین السعید جریدے وچ شائع تھیندے رہے۔ انہاں نے جنوری 1963ء وچ دورہ حدیث مکمل کیتا۔ علم وراثت دی تعلیم انہاں نے مفتی سراج احمد خان پوری توں حاصل کیتی۔

درس نظامی اتے دورہ حدیث دے بعد انہاں نے منطق اتے فلسفہ دی تعلیم کیتے موسی والی (میانوالی) وچ میاں سلطان اعظم اتے ول بندیال شریف وچ عطاء محمد بندیالوی توں استفادہ کیتا۔ نومبر 1964ء وچ انہاں نے اسلامیہ یونیورسٹی بہاولپور وچ داخلہ ڳھدا اتے جون 1966ء وچ تخصص فی الفقہ دی ڈگری حاصل کیتی۔

تعلیم مکمل کرݨ دے بعد جون 1966ء وچ او اپݨے آبائی وستی واپس آئے اتے دیرہ اسماعیل خان دے دور افتادہ علاقیاں وچ اسلام دی تبلیغ شروع کیتی۔ 21 مئی 1967ء کوں انہاں نے شانِ نبوت و ولایت دے تحفظ کیتے ہک وݙا اجلاس منعقد کیتا۔ تبلیغ دے نال نال انہاں نے تدریس اتے تحقیقی کم وی جاری رکھا اتے "اقوال النصیحہ فی مسائلِ ذبیحہ" تصنیف کیتی۔

استاد

• سید احمد سعید کاظمی (1913ء-1986ء)
• مفتی امید علی خان (1883ء-1964ء)
• سید مسعود علی قادری (1909ء-1973ء)
• مفتی عبد الکریم
• محمد جعفر
• عبد الحکیم

1967ء وچ او اپݨے چاچے دے اصرار تے مدرسہ انوارِ باہو بھکر منتقل تھی ڳئے اتے اپݨی زندگی دا بیشتر حصہ اتھائیں گزارا۔ انہاں نے ایں مدرسے کوں جامعہ وچ تبدیل کیتا اتے ایندیاں متعدد شاخاں قائم کیتیاں۔

شاخاں

• انورِ باہو، محلہ سردار بخش، بھکر
• مدرسہ غوثیہ قادریہ، بانو بازار، بھکر
• حسنیہ نوریہ دارالقرآن، ریلوے روڈ، بھکر
• مدرسہ انوارِ باہو، زندانی، ڈیرہ اسماعیل خان
• مدرسہ انوارِ باہو، گنڈی عمر خان، ڈیرہ اسماعیل خان
• مدرسہ انوارِ باہو، جھوک عبد اللہ، ڈیرہ اسماعیل خان

انہاں نے بغیر معاوضے دے درس نظامی دی تعلیم ݙتی اتے جامع مسجد خلفاء راشدین بھکر وچ خطبہ جمعہ ݙیندے رہے۔

اپݨے جد امجد دی طرح او طریقت تے یقین رکھدے ہن اتے اپݨے پیو دے ہتھ تے سروری قادری سلسلے وچ بیعت تھئے۔ عشق رسول ﷺ انہاں دی زندگی دا اہم ترین پہلو ہئی۔

1969ء وچ انہاں دا نکاح اپݨی سوتر نال تھیا۔ انہاں دے چھی ٻال ہن۔

9 رمضان المبارک 1427 ہجری بمطابق 3 اکتوبر 2006ء کوں روزہ دی حالت وچ درود شریف پڑھدے ہوئے انہاں دا انتقال تھی ڳیا۔ انہاں دی نماز جنازہ محمد شریف رضوی نے پڑھائی اتے انہاں کوں جامعہ انوار باہو بھکر وچ دفن کیتا ڳیا۔

دسمبر 2016ء وچ انہاں دے پتر سلطان ناصر نے انہاں دی سوانح عمری "سیرتِ نور" شائع کیتی۔

ٻاہرلے لنک

• علامہ نور سلطان القادری پیج فیس بک پر