نور الدین زنگی

نور الدین زنگی (ڄمݨ دی تریخ: 1118ء – وفات دی تریخ: 1174ء) زنگی خاندان نال تعلق رکھݨ آلے ہک ترکمان حکمران ہن جنہاں نے 1146ء توں 1174ء تک سلجوقی سلطنت دے شامی صوبے تے حکومت کیتی۔ او ݙوجھی صلیبی جنگ دی ہک اہم شخصیت ہن۔

نور الدین نے بیت المقدس کوں مسیحیاں توں واپس گھنݨ کیتے ہک مضبوط حکومت قائم کرݨ دی کوشش کیتی اتے ایں مقصد کیتے گرد و نواح دی چھوٹی مسلم ریاستاں کوں اپݨی سلطنت وچ ضم کر ڳھدا۔ انہاں نے حلب کوں اپݨا پہلا دارالحکومت بݨایا اتے بعد وچ 1154ء وچ دمشق تے قبضہ کر کے اونکوں دارالحکومت قرار ݙتا۔ انہاں نے صلیبی ریاست انطاکیہ تے حملے کیتے اتے کئی قلعیاں تے قبضہ کیتا۔ ݙوجھی صلیبی جنگ دے دوران دمشق تے صلیبیوں دے قبضے دی کوشش کوں ناکام بݨایا۔

1169ء وچ نور الدین نے مصر تے وی قبضہ کر ڳھدا اتے فاطمی حکومت دا خاتمہ کر ݙتا۔ انہاں کوں روضہ رسول صلی اللہ علیہ وآلہ وسلم دی حفاظت دی سعادت وی حاصل تھئی جݙݨ انہاں نے ہک سازش کوں ناکام بݨایا جیندے وچ مسیحیاں نے روضہ مبارک توں جسد اقدس کڈھݨ دی کوشش کیتی ہئی۔

نور الدین بیت المقدس تے حملہ کرݨ دی تیاری کریندے پئے ہن کہ 1174ء وچ 58 سال دی عمر وچ انہاں دا انتقال تھی ڳیا۔ او ہک بہادر، شریعت دے پابند اتے عادل حکمران ہن۔ انہاں نے اپݨی سلطنت وچ مدارس اتے ہسپتال قائم کیتے، ناجائز ٹیکس ختم کیتے اتے رفاہ عامہ دے ٻہوں سارے کم سرانجام ݙتے۔ مورخ ابن اثیر نے انہاں کوں خلفائے راشدین اتے عمر بن عبدالعزیز دے بعد بہترین حکمران قرار ݙتا۔