نور احمد غازیؔ

اصل ناں          نور احمد

قلمی ناں          نور احمد غازیؔ

جمن               1937ء

تعلیم             بی اے

پیشہ               ریٹائر ریلوے ملازم

جاء پتہ          3/87ڈبلیو بلاک نیو ملتان

نور احمد غازی 1937ء کوں مشرقی پنجاب( انڈیا ) دے ضلع ہوشیار پور وچ پیدا تھئے تقسیم دے دوران 1947ء کوں اوہ ہجرت کر کے اپنے والدین دے نال ملتان آگئے۔تے ول نقل مکانی کر کے کہیں بئے پاسے نہ گئے تے بی اے تک ملتان توں ہی تعلیم حاصل کیتی تے ول پاکستان ریلوے دی ملازمت اختیار کر کے اپنی عمل زندگی دا آغاز کیتا ۔نور احمد غازی اردو، سرائیکی تے پنجابی دے سہ زبان شاعر ہن ۔ شاعری توں علاوہ اوہ ہک خوبصورت نثر نگار وی ہن ۔ آب و آتش (طنز و مزاح)رقصِ حیات (ناول)درندے (ناول)  رات ، جگنو اور راستے (افسانے )آدابِ جنوں (شاعری) آپ دیاں مقبول ترین کتاباں ہن۔شاعری دے حوالے نال انہاں درجناں شاگرداں دی رہنمائی وی کیتی ہے۔غازی صاحب ہک انتہائی شریف النفس انسان، معتدل مزاج تے ادب پرور شخصیت ہن۔ اوہ ادبی تنظیم ’’ ساغر صدیقی رائٹرز کونسل ‘‘ ملتان دے نگرانِ اعلیٰ تے ’’ غازی اینڈ نیازی فروغ ادب سوسائٹی ‘‘ ملتان دے صدر ہن ۔مگر اجکل غازی صاحب پیرانہ سالی ، کمزوری دی وجہ توں ادبی محفلاں وچ بہوں گھٹ ویندن۔

(1)غزل

اے کیجھی گھلی ہے ہوا شہر وچ

بھرا دا ہے دشمن بھراشہر وچ

ہے لوبھی ہر ہک شخص زر، مال دا

نہیں یاد کہیں کوں خداشہر وچ

غریباں دا جیون ہے مشکل سدا

تے مرناں وی مشکل تھیا شہر وچ

کیویں اپنے سنگتی کوں گولے کوئی 

کہیں کوں نئیں کہیں دا پتا شہر وچ

بہوں سادگی ہے، بہوں بھولپن

گولیندا ودے کئی وفا شہر وچ

ختم کر کے جھگڑے، گلے شکوے سب

گلکڑی توں ہر کہیں کوں پا شہر وچ

اندھارے توں نفرت دے غازیؔ مِٹا

محبتاں دا کر سوجھلا شہر وچ

  (2) غزل

سانواں سوجھل ونڈاوناں پوسی

کلمہ حق دا ا لاوناں پوسی

اے کلہیپا تاں جان کڈھ گھنسی

کہیں کوں اپناں بناوناں پوسی

اپنے اندر دے سوجھلے کیتے

دل  دا  ڈیوا جلاوناں  پوسی

اپنے  حصے  دا  بار ہر کہیں کوں

سر تے اپنے ای چاوناں پوسی

اپنی دھرتی دی مانگ کوں غازیؔ

نا ل لہو  دے  سجاوناں پوسی

٭٭٭