نورنامے
نور نامے او قدیم ترین نظماں ہن جنھاں وچ نورِ محمدیؐ دی تعریف و ثنا کیتی ڳئی ہے ۔ سرائیکی زبان دا مشہور نور نامہ حضرت مُلاں دا لکھیا ہویا ہے ۔ ایندے اشعار دی تعداد 150ہے تے اے مثنوی دی طرز تے لکھیا ڳے ۔ خود نورنامے دا مصنف حضرت مُلاں ایندا سن تحریر 500ہجری بیان کیتے۔
پنج سو سال جو گزرئیے آ ہے ہجری بعد رسولوں
مُلاں کہے غریب وچارا کم علماواں کولوں (9)
ایں نورنامے وچ حمد الٰہی دے بعد شاعر آہدے کہ اللہ سوہݨے کوں اپݨا آپ سنڄواون تے اپݨا محبوب پیدا کرݨ دی خواہش پیدا تھی۔ تاں کُن فرما تے جو کجھ مخفی ہئی اسرار دے خزانے جو لُکیے ہوئے ہن ظاہر کر ڈتونس ۔ ول نورِ محمدیؐ دا شان بیان کیتا ڳے۔
عرش آفتاب تے چن کرسی دے جو کجھ کل ستارے
ھکے وال نبیؐ دے کولوں چارے ٹول سنوارئیے
جو کجھ چوݙاں طبقاں دے وچ پیدا کل خلائق
نبی محمدؐ جیہاں رتبہ نیں کیں دے لائق (10)
ایندے بعد معراج دے معجزہ کوں بیان کیتا ڳے کہ کیویں اللہ سوہݨے دا حضرت محمدؐ سئیں کوں معراج نصیب تھیا۔
ہوا سوار براق دے اُتے ونڄ چڑھیا اسمانے
حضرت تائیں ظاہر کیتس کل اسرار خزانے
نو اسمان کیتے رب پیدا ہر اسمانے چڑھیا
گنبد عرش ٹکانیں ہویا قدم نبی جاں دھریا
ساز وضوں ݙوں نفل رکعتاں ترت گذار سدھایا
کُنڈی پاݨی ہلدے آہے جاں پھر سجدے آیا (11)
ول خلفائے راشدین دی شان دا بیان اے۔ اوندے بعد سرور کائنات دے پاک نوری دی تخلیق کوں موضوع بݨایا ڳے۔ حضرت ملاں دے ایں9سو سال قدیم نعتیہ نورنامے دے علاوہ مراد نابینا ۔ امام الدین بھکوی دا نورنامہ محمدی۔ مدحتِ رسول مقبول صلعم وچ تصنیف کیتے ڳن۔
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان