نواب ولی محمد لغاری
پ1165ھ وفات :1247)ھ۔1832ء)
- آپ اپݨے پیو میاں محمد خان دے ݙوجھے پتر ہن ۔ آبھپور (ضلع سانگھڑ) وچ پیدا تھئے۔ اوں ویلھے سندھ دا حکمران نور محمد کلہوڑا ہا۔ آپ دے والد فارسی دے عالم فاضل ہن۔ انھاں اپݨے پتر کیتے تعلیم دا ٻہوں چنگا انتظام کیتا۔ عربی اتے فارسی دی تعلیم توں بعد آپ امیر فتح علی تالپور دے ملازم تھی ڳئے۔ بے شمار خوبیاں رکھیندے ہن۔ آپ ہک کامیاب سپہ سالار ‘ سفیر ‘ وزیر منتظم ‘ انجینئر ‘ حکیم فلسفی اتے محب وطن شاعر ہن۔ تالپوری عہد دی تاریخ اِچ آپ دے کارنامیاں داذکر جا جا تے ملدے آپ امیر فتح علی خان دے وݙے وفادار اتے با اعتماد صلاح کار ہن۔وسیع النظر دور اندیش ‘ روشن دماغ اتے ہمہ گیر شخصیت دے مالک ہن۔ آپ دا شمار سندھ دیاں اعلیٰ شخصیتاں وچ تھیندے۔
ݙوہڑہ
[لکھو | ماخذ وچ تبدیلی کرو]آ دلبر دیدار ݙکھایا قلب اندر سبحانی
کھول نقاب ݙکھایس صورت حسن جنھاں دا لاثانی
صوفی وحدت جام پلایا ہویا لطف ربانی
وسدا نور مثل شبنم دے وچ ݙاہڈی رمز نہانی
ولی محمد ہیں عبرت دیوچ گم عقل انسانی
کافی
[لکھو | ماخذ وچ تبدیلی کرو]کر سوہݨا سانگ سماوݨ دا
ݙے کوئی محب دلاسا آنوݨ دا
تیݙا شوق توڑے ہے ذوق ٻہوں
بناں ݙیکھݨ تیݙے خوش کینویں رہوں
ایں حال دی ڳال کہیں نال کہوں
نہیں کجھ کہیں دے سݨانوݨ دا
تیݙا رُخ مہتاب حجاب دے وچ
جیویں گل نرگس نیم خواب دے وچ
ہُݨ کھول نقاب شتاب دے وچ
دعوہ ݙے کوئی نینہ نبھاوݨ دا
تیݙی لعل لباں کیتا لعل خجل
من موج نیتا تیݙی دھار کجل
چن دام دوئی دا لہاہ خلل
گھت فرق نہ ماگ مٹاوݨ دا
تیݙے ہار سنگار دا مل نہ کو
ابر سیف تیݙی دا تل نہ کو
تیݙے گُل رُخ جیہا گُل نہ کو
جلدی نام ٹھہا کوئی ملاوݨ دا
تیݙے ناز دے ساز وجن دم دم
جیویں چنگ اپنگ مردنگ دھدھم
ساݙا حال حوال تیکوں مَعلُم
ایوہ بارنی ساݙے چاوݨ دا
ولی محمد چاتوں رندی دا قدم
آخر چلݨا ہی وچ ملک عدم
ہݨ سمجھ معنی و فی انفسکم
رکھ ذاتی شوق درماوݨ دا
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان