نواب محمد اکبر خان شائق

نواب محمداکبر خان شائق والیٔ ٹانک نواب شاہ نواز خان خادم دے وݙے پتر ہن۔ آپ ٻہوں خوبصورت نینگر ہن۔ اپݨے حریت پسند والد دی طرح آپ وی انگریزاں دے سخت دشمن ہن۔ شائق ݙوہڑیاں ‘ کافیاں دے علاوہ نوحے تے مرثیے وی لکھین۔ نواب محمد اکبر خان اپݨے والد دی قید و بند کنوں سخت مایوس ہن۔ ایندے علاوہ انھاں کوں نک دے وچ ناسور دی بیماری لڳ ڳئی۔ انھاں حالات توں مجبور تھی شائق اپݨے والد دی قید دے دوران اِی خود کشی کر گھدی ہئی۔ پتر دی جوان موت تے نواب شاہ نواز خادم وݙے دردیلے ݙوہڑے لکھئے۔

خود کشی توں ذری پہلے لکھئے ڳئے شائق دے ݙوں ݙوہڑے:

یار پوائے ڳل ہار غماں دے میݙی ہجر تے عمراں لنگھدی

ݙکھاں کیتے لائق قبر دے نہیں خواہش طول پلنگ دی

لا علاج ہے مرض میݙی نہیں دل حیاتی منگدی

بس کر شائق اتھاں کجھ نی کیتا نی چلدی حکمت ہند فرنگ دی

آخری ݙوہڑہ:

دل کوں شوق ملݨ دی روح کوں تانگھ نکلݨ دی

جی اُداس پھرے ہر ویلے بدلݨ کوں تانگھ مدفݨ دی

تقدیر نے آن تدبیر بݨائی کوئی کفن دے ہیٹھ سمݨ دی

بس کر شائق سُݨ رہسن یار پیارے تیݙی حالت ایہا مرݨ دی

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان