نواب شاہ نواز خان خادم
نواب شاہ نواز خان خادم والیٔ ٹانک سرائیکی زبان دے ہک منے ہوئے شاعر گزرین۔ نواب صاحب مرثیہ گوئی وچ وی کمال رکھدے ہن۔ اپݨے ہمعصر شعراء سید ذوالفقار علی شیرازی ‘ غلام سکندر غلام ‘ مولوی فدوی نال انہاندی ݙاڈھی سنگت یاری ہئی۔1869 دیرہ اسماعیل خان دے علاقے وچ انگریزاں دی عملداری تھئی تاں نواب شاہنواز خان انگریزاں دی بھر پورمخالفت کیتی۔ جیندی وجہ توں انھاں کوں قید کر گھدا ڳیا۔ پہلے انگریز انھاں کوں لیہ گھن ڳئے تے ول نواب صاحب کوںلاہور منتقل کر ݙتاڳیا۔ نواب صاحب کجھ عرصہ پشاور وچ وی قید ریہے۔ نواب صاحب ٻہوں وݙے علم دوست انسان ہن۔ آپ خوداِی ہک صاحب طرز شاعر تے مرثیہ گو شاعر ہن۔ انھاں دے اپݨے کلام وچ انگریز حاکماں دی مخالفت دا اظہار کیتا کہ فرنگی حکمران عورت (ملکہ وکٹوریہ) دی غلامی کنوں موت کوں ترجیح ݙتی۔ نواب صاحب دی وفات قید دے دوران 20صفر 1299ھ کوں لاہور وچ تھئی تے آپ بی بی پاکدامن دے احاطے وچ دفن تھئے۔(84)
مکر فریب جہان اِچ پِسراکوڑ دیاں چڑھیاں کانگاں
شاہسوار پھرن پیادے پاولیاں دے ہتھ سانگاں
شیر اسیر تقدیرے سنگل چوڑھے مارن ݙانگاں
خادم رناں دے سر شاہی آئی ککڑ ݙیون بانگاں
………
نیلی اَکھ وچ حیا نی ہرگز اساں کیتا ول ول پک اے
نہیں عدالت ہے خجالت اندھے والا بک اے
خادم بھولوں دی اشنائی کنوں حاصل چونڈھی چک اے
………
اساں دامن فیض فیاض نپیا پنجتن پاک اطہر دا
ہے راضی ہر رضا اُتے مدح شبیر شبر دا
بے تمیزاں دے طعن کنوں ہاں ہرگز ݙردا
خاتون جنت خود مدد کریسی نہ ہاں ٻانھاں غیر دے در دا
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان