نواب بہاول پور دے ناں علامہ اقبال دیاں چٹھیاں
علامہ اقبال دی ریاست بہاول پور نال خط و کتابت جاری رہ ویندی ہئی ، علامہ اقبال دیاں چٹھیاں نواب بہاول پور دے پرائیویٹ سیکرٹری میجر شمس الدین دے ناں اَمدیاں ہن ، انہاں چٹھیں دا خلاصہ میجر شمس الدین نواب بہاول پور دی خدمت وچ پیش کریندے ہن اَتے نواب بہاول پور احکامات جاری کریندے ہن ، انہاں چٹھیں دا ریکارڈ ’’صادق گڑھ پیلس‘‘ وچ موجود ہے ، اللہ سئیں نواب دی اولاد کوں عقل ݙیوے ، آپت وچ ہک تھیوݨ صلح کرݨ تاں جو صادق گڑھ پیلس وچ سرائیکی قوم دا تاریخی ورثہ اَتے دستاویزاں سیوی دی خوراک تھیوݨ توں بچ سڳے ، عرض پیا کریندا ہم جو علامہ اقبال سرائیکی وسیب دے ݙوجھے اکابرین دے نال نال نواب بہاول پور کوں خط لکھدے رہ ویندے ہن۔
ہک واری نواب بہاول پور کوں ریاست واسطے قانونی مشیر دی ضرورت درکار تھئی ، ریاست دی طرفوں اخبار وچ اشتہار جاری تھیا ، جݙاں علامہ اقبال پڑھیا تاں انہاں لکھیاں جو ریاست بہاول پور دی قانونی مشیری میݙے واسطے سعادت اَتے خوشی دی ڳالھ ہوسے ایں طرح قائد اعظم محمد علی جناح پڑھیا تاں انہاں اپݨی خدمات پیش کر ݙتیاں۔
آکھیا ویندے جو جݙاں قانونی مشیر محمد علی جناح بݨیے تاں ایں ڳالھ دا علامہ اقبال کوں ملال تھیا تے انہاں آکھیا جو پہلے میں آکھیے لہٰذا قانونی مشیربݨݨ دا حق پہلے میݙا ہا پر اے کاوڑ تے ملال معمولی ہا جیرھا فوراً ختم تھی ڳیا ، اَڄ اے ڳالھیں اساکوں تاریخ دے کتابیں وچ نی مِلدیاں پر انہاں تاریخی حقیقتیں کوں سانبھݨ اَتے انہاندی حفاظت کرݨ دی ضرورت اے ۔ ہُݨ اساں علامہ اقبال دے خطیں دے نمونے تہاݙی خدمت وچ پیش کریندوں ، اے خط صاحبزادہ قمر الزمان عباسی دی کتاب ’’بہاول پور کا صادق دوست‘‘ وچوں حاصل کیتے ڳن۔
٭٭٭
حوالہ
[لکھو | ماخذ وچ تبدیلی کرو]کتاب: علامہ اقبال تے سرائیکی وسیب ،مصنف : ظہور دھریجہ، ناشر: جھوک پبلشرز ملتان