نماز تے روزے
نماز روزے دی نِکے لا توں پابندی ہئی ،ابا سئیں صوم وصلواۃ دے پابند ہن ، اساں وی ابے نال نمازاں پڑھدے ہاسے ، میݙی عمراں شیت ست اَٹھ سال ہوسے سیالے دے روزے ہن، سارے روزے رکھیندے ہاسے ،ترابیاں وی پڑھدے ہاسے، روزے افطاری ویلے شام کوں مسیت ء ِچ ݙاڈھی رونق ہوندی ہئی،نانے سئیں دے گھروں طعام اَمدا ہا ،نال نال وستی آلے سارے اپݨے اپݨے گھروں روٹی ، چاول ، سیویاں یا گھر ء ِچ جو کجھ پکے ہا مسیت ء ِچ بھجیندے ہن ،مسیت بھری پی ہوندی ہئی ، وݙے چھوٹے سارے کٹھے ہوندے ہن ،لائن دے پاروں اَدا اسماعیل یا اُوندا بھرا چوہدری غلام رسول ہر روز مِٹھے چاول پکا اَمدے ہن ،جہڑی ٻالٹی ء ِچ چاول چا اَمدے ہن ، اُو پیلے رنگ دی پِتل دی ٻالٹی ہوندی ہئی۔حافظ محمود کانجوں ہن تاں اکھیں توں متھاج پر قرآن سوہݨا پڑھدے ہن ، ہر روز سپارہ سوا سپارہ منزل ہوندی ہئی ،ہک رات ترابیاں پڑھدے کھڑے ہاسے ،سڑک آلے پاسوں دھاڑ دھاڑ دی آواز آئی ، سلام ولا تے سارے بھڄ پیوسے ،اُتھاں کیا ݙیکھدوں ہک اجنبی اپݨے آپ کوں ٹالھی نال ٻدھ تے دھاڑ دھاڑ کریندا کھڑے ،ساریں پچُھیا جو کیا تھے؟ اُوں آکھیا ! میکوں سہجے وِچ ݙرایا ہانے جو اڳوں میتلیں دی وستی اے او بندے کوں پکڑ تے مار ݙیندن ، میں ݙر تے اپݨے آپ کوں ٻدھے تے دھاڑ دھاڑ ہکلی اے جو میکوں بچایا ونڄے،اساݙے وݙیں آکھیا جو پاڳل ! اے میتلیں دی نی دھریجے دی وستی ہے ، توں اے سانگ نہ رچاویں ہا ،ایویں لنگھ آویں ہا تیکوں روٹی ،رہائش مل ونڄے ہا ،وݙے اونکوں مسیت ء ِچ گھن آئے ،مانی کھوائی تے سویلے اونکوں کرایہ بھاڑہ ݙے تے روانہ کیتا ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان