نفرت دا لاوا

ساڈے دماغ اچ نفرت دا ہیک غیر معمولی بڑکدا لاوا ہے، او پکدا پئے، ٹی وی تے بیٹھے سرمایہ دار دے ملازم او پکیندے بیٹھن، سرمایہ دار دے پکووے مسیتاں اچ وڑیے بیٹھن، او نت لاوا پکیندے بیٹھن، بس اساں ہنڑ لڑدے پئے ہیں، سرمایہ دار ریاست دے ملازماں اعلان کرڈتا، لاوا پھٹ پیا، پڑھیے لکھیے وی سوشل میڈیا تیں محاذ آرائی شروع کر ڈیندن، اساں انھاں کوں ونجا کے رکھ ڈیسوں، اساں انھاں کوں برباد کر ڈیسوں، لڑاند بھڑاند، جنگ، سبھ ساڈے دل کوں سکون ڈیندن،، ہیک بندے مارنڑ آلا پرزہ اساں بنڑایا، بس اوندے اتیں ساکوں فخر ہے، اوندی محافظت سانگے جام مدد علی دی کتاباں آلے پیسے چا گھدے گئے، راجن پور دے کہیں غریب دی دوائی کھس گھدی گئی، تونسے دے کہیں غریب دی فصل تباہ کر ڈتی گئی، سکھر دے کہیں مزدور کوں رول ڈتا گیا، اساں محافظت پئے کریندوں، او پرزہ مار ڈتا گیا، اساں جیت گیوں او ہر گئین، بندے تاں مر گئے، میں خاب ڈیھدا رہیاں، سوچیندا رہیاں، ہنڑ میڈی روح پکھی ودی گولیندی ہائی پتہ لگا جو گیرے کوں او پرزے قتل کرڈتے، ہنس ہنڑ کینی، میں اشو دی نظم کینویں پڑھاں ؟ کیندے واسطے پڑھاں؟ زناور نئیں رہ گئے، ونڑاں دی نہ ڈسنڑ آلی رت بھوئیں کوں مونجھا کرڈتا، فضا دا ہیک ہیک ایٹم نوحے پڑھدا خدا دو ٹر گیا، بھوئیں دے ماتم ہن، بلہنڑ قتل تھی گئی، سندھو سئیں کوں زہر پلا ڈتی گئی، خواجہ صیب دے مزار توں ہیک وینڑ آندے "کتھاں درد کتھاں درمان بنڑوں" چاچے واحدو دا باغ قتل تھی گیا، اے ارمان سبھ توں ودھ ہے، امب دا او درخت جیہرا میکوں ڈیکھ کے کھلدا ہا، قتل تھی گیا، خدا ہیک فرشتے کوں بھیجیا، ونج ڈیکھ آ وسوں کوں، فرشتے آن پچھیا کیہری وسوں؟ اتھاں تاں رت ہے، تیڈے مسلمان کامیاب تھی گئین، انھیں کلمہ پڑھ تے حملہ کیتا ہا، بھگوان کوں کہیں اوندے کلرک ونج ڈسیا گیتا رت اچ بڈی لاتھی اے، عیسی کوں آپنڑے درد بھل گئے، حسین کوں سندھو دے پونگھیں دا ڈاڈھا ارمان تھیا، بس اگلی دفعہ وسوں وسیسوں، اوندے وچ قتل کرنڑ آلے پرزیں دے سامان نہ بنڑیسوں، دھماکے آلا مواد بھوئیں دے پیٹے اچ نہ رکھیسوں، بندوخاں کوں زنگال لا ڈیسوں، خدا آکھیا اے بھوئیں تیں ڈھاونڑ والے رت دے ٹیپے میکوں ارمانی کر گئین، ایٹم بم ساڈی وسوں کوں کھا گئے. مظہر حسین