نعتیہ سی حرفیاں

سی حرفی وی ہک مقبول صنف سخن رہی ہے ۔ تقریباً تمام بزرگ شعراء ایں صنف وچ طبع آزمائی کیتی ہے ۔اکثر سی حرفیاں نعتیہ ‘ صوفیانہ تے عارفانہ مزاج دیاں ہن۔ نعتیہ سی حرفیاں وچ عہدِ جہانگیری دے شاعر سیدامیر حیدر میرن ‘ علی حیدر ملتانی ‘ حضرت حافظ جمال اللہ ‘ حمل خان لغاری ‘ حضرت سچل سرمستؒ ‘ فائق ‘ شائق ‘ سید مبارک شاہ ‘ محمد بخش بخشا ‘ سید شیر محمد گیلانی تے میاں رحیم بخش دے ناں قابل ذکر ہن۔ امیر حیدر میرن دی ہک نعتیہ سی حرفی دا بند۔

م محمدؐ دے ناں توں گھول گھتاں جگ سارا ما

عاجز جئی کان کمینی چھوڑویس تخت ہزارا ما

میں ماندی درماندی کوں ݙکھلایُس روپ نظارہ ما

میرݨ شاہ میݙے من بھایا ماہی ماہ متارا ما(25)

علی حیدر ملتانی دیاں پنج سی حرفیاں کوں وݙی شہرت حاصل تھئی۔ علی حیدر ملتانی کوں رسول کریم صلعم نال بے حد عشق ہئی۔ او کیویں کونین دی چھاں وچ عقیدتاں دے نذرانے پیش کریندن:

م محمد صلی علیٰ دا ہر دم ساکوں آسرا اے

اسے دی اُمید ساہاں عملاں نہ بھرواسڑا اے

اوسے دے دربار دے سائل ہتھ اساڈڑے کاسڑا اے

اوسے دے دلاسے تے حیدر ہنجوں والا ہاسڑا اے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان