نعتیہ سہرے

سرائیکی زبان دے شعری ادب وچ بے شمار نعتیہ سہرے وی ملدن۔ جئیں وچ معراج تے حضور کریمؐ دے تشریف گھن ونڄݨ کوں موضوع بݨا تے وصال دے سہرے آکھیے ڳن۔ مولانا شوق نے109صفحات وچ معراج مصطفیٰؐ دے سہرے کوں منظوم کیتے۔ ایندی نظم تے نثر ݙوہیں انتہائی عالمانہ تے رواں ہن۔ محمد شاہ حقانی نو بہار سیری ہک مہاندرے نعت گو شاعر گزرن ۔ 1353ھ وچ آپ دا ہک نعتیہ مجموعہ کلام شائع تھے جئیں وچ معراج دے سہرے ، مہندی دے سہرے اپݨی مثال آپ ہن۔

معراج ماݨے بناں معراج ماݨے وے

سرتاج ماݨے بناں جگ راج ماݨے وے

آکھے محمد شاہ کیا سائیں تیݙی صفت تاں مکدی ناہیں

تھیا خشک ختم مس پناں معراج ماݨے وے(28)

سرائیکی زبان دیاں انھاں خاص اصناف دے علاوہ نعتِ نبی کریم صلی اللہ علیہ وسلم کیتے ایں زبان دی ہک مہاندری صنف ’’مولود‘‘ ہے جئیں وچ آپؐ دے درودِ مسعود دے علاوہ ݙوجھے وی ہر قسم دے نعتیہ مضامین بیان کیتے ویندن۔ نعت تے مولود ہک ٻئے نال ٻہوں حد تک سانجھ رکھدن۔ سرائیکی زبان دے وݙے نعت گو شعراء وچ حضرت خواجہ غلام فریدؒ ‘ محمد یار بلبل ‘ شاطر نماناں ‘ مجروح شاہ ‘ سید جلال کلیم ‘ خرم بہاول پوری ‘ گلشن‘ کمتر ‘ کہتر ‘ نورن گدائی ‘ صابر مبارک پوری تے سید ولایت شاہ دے ناں ٻہوں مشہور ہن۔ سرائیکی زبان دے شعری ادب دا دامن نعتِ رسول مقبول صلی اللہ علیہ وسلم نال رَڄ رَڄ تے بھریا ہویا ہے ۔ اتنیاں زیادہ نعتیہ اصناف سخن شاید ٻئی زبان اِچ ملن محال ہے۔ سرائیکی زبان وچ نعت گوئی دا زیادہ تر موضوع واقعہ معراج ۔ کونین دے سوہݨپ دا سراپا۔ حلیہ مبارک ‘ درود  سلام ‘ روضہ اقدس دی زیارت سک آپ دے قُرب دی سک‘ اپݨے گناہگار ہووݨ تے پشیمانی ‘ مدنی منٹھار توں دوری دی ارداس ہے۔اوندی بخشش دا سہارا تے اوندے کرم دی آس ہے ۔ݙوں جڳ دے محبوب دی شان بیان کرݨ ایں دنیا دی سب توں وݙی خوش بختی ہے تے سرائیکی شعراء مذہبی شاعری دے ضمن وچ اے سعادت رَڄ رَڄ تے حاصل کیتی ہے حضرت خواجہ فریدؒ سئیں دا نذرانہ عقیدت:

اتھاں میں مٹھڑی نت جان بلب

او تاں خوش وسدا وچ ملک عرب

تونیں دھکڑے دھوڑے کھاندڑی ہاں

تیݙے نام توں مفت وکاندڑی ہاں       

تیݙی باندیاں دی میں باندڑی ہاں

ہے دَر دے کتیاں نال ادب

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان