نعتیہ جوگی نامے
سرائیکی زبان وچ ہک ٻئی قدیم صنف جوگی نامہ مدتاں تئیں ورتی ڳئی ۔ محبوبِ حقیقی کوں جوگی دے ناں نال یاد کر تے اپݨے دل دیاں مونجھاں ‘ ارداساں تے سکاں دے حال ݙتے ویندن۔ نعتیہ جوگی نامیاں وچ باغ شاہ دے جوگی نامے کوں خاصی شہرت حاصل ہے ۔ ایں جوگی نامے وچ سرورِ کائنات دی ایں دنیا تے تشریف آوری ‘ آپؐ دی رحمت تے شفاعت دا وݙی عقیدت مندی نال اظہار کیتا ڳے۔
ویساں جوگی دی طرف ضرور نی
ٻاجھوں دل طاقے
رہساں خاص حضور نی
میݙا دل مشتاقے
تخت ہزاروں ہک جوگی آیا
جھنگ سارے جیں فیض کھنڈایا
کیتس لطف و نور نی
دھماں ملک افلاک اے
شان جوگی دا ہے لولاکی
سجدہ کردے سب افلاکی
خادم حور قصوری نی
دوڑن بیش براقے
باغ شاہ دے ایں جوگی نامے دے علاوہ ہک ٻیا قدیم جوگی نامہ مولوی نبی بخش بخشا دا ملدے ۔ اے باغ شاہ والے توں مختلف ہے ۔ پنج پنج مصرعیاں دا ہک ہک بند ہے تے ہک ہک لفظ وچ لکھاں کروڑاں عقیدتاں ݙسدین۔
ویساں جوگی دے نال
رمزاں زورے زورے لائیاں
ہے جوگی لجپال
جھوکاں عرش تے لائیاں
جوگی میݙا پاکوں پاک اے
خاطر جیندی کل لولاک اے
ادبوں حاضر تھی کھڑا براق اے
عاشق خود غفار اے
حوراں خدمت آیاں (20)
انھاں جوگی نامیاں دے علاوہ ہیر تے اوندی مادی طرفوں سوال تے جواب دے انداز وچ کئی جوگی نامے لکھیئے ڳن۔ مولوی نبی بخش بخشا وی ایجھے جوگی نامے لکھین۔ سید مبارک شاہ کافی دے انداز وچ نعتیہ جوگی نامے لکھیئے۔
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان