نظم ’’پیسہ‘‘

سب کجھ کر ݙکھلیندے پیسہ

پیسہ دِل کوں رکھدے راضی

راہندی روز طبیعت تازی

ہر جاہ تے او جیتے بازی

جئیں تے مہر کریندے پیسہ

سب کجھ کر ݙکھلیندے پیسہ

ونڄے دولت مند کتھائیں

پیسے نال ہزاراں جائیں

ہر کوئی آہدے لنگھ آئو سائیں

سئیں سئیں پیا سݙویندے پیسہ

سب کجھ کر ݙکھلیندے پیسہ

پیسے ٻاجھ اَلیندا کوئی نی

حال حوال ونڈیندا کوئی نی

سُدھ سنبھال کریندا کوئی نی

ہر کوئی پیا سنبھلیندے پیسہ

سب کجھ کر ݙکھلیندے پیسہ

پیسہ ہے انسان دی شان

پیسے نال سݙیندن خان

رئیس‘ مہر‘ ملک ‘ دیوان

ماݨ سُنڄاݨ وَدھیندے پیسہ

سب کجھ کر ݙکھلیندے پیسہ

پیسہ جیندے کولھ نہ ہووے

او شودا قسمت کوں رووے

دشمن دے وی پیریں پووے

من مَنیاں منویندے پیسہ

سب کجھ کر ݙکھلیندے پیسہ

دولت جیندے کول زیادی

ٻیٹھا ہووے عمراں کھادی

نینگر نال کریندے شادی

ٻڈھے کوں پرنیندے پیسہ

سب کجھ کر ݙکھلیندے پیسہ

پیسے کیتے چھوٹے ٻال

روندن روز ونڄیندن حال

تھیندن پیسے نال نہال

روندیں کوں کِھلویندے پیسہ

سب کجھ کر ݙکھلیندے پیسہ

پیسے جیہاں نہیں معشوق

جیڑھے ٻیٹھن پیسے  پھوک

سُݨدن ہُݨ پیسے دی ہُوک

رَت دے نیر رُویندے پیسہ

سب کجھ کر ݙکھلیندے پیسہ

پیسے کیتے سکّے بھائی

شام سویرے کرن لڑائی

کاتیاں پھردِن تیر کلائی

ݙاڈھے شر گھتویندے پیسہ

سب کجھ کر ݙکھلیندے پیسہ

رُٹھا ہووے کوئی بِھرا

چَئُوں پیساں دی کَس چا کھا

مَیں اَزمائے ہُݨ تُوں اَزما

رُٹھے وِیر منیندے پیسہ

سب کجھ کر ݙکھلیندے پیسہ

بِن پیسے دے یار پیارے

ویندن کر کنارا سارے

کوئی بَرما کوئی بلخ بخارے

وَسدی جھوک اُڄڑیندے پیسہ

سب کجھ کر ݙکھلیندے پیسہ

جیکر پَلّے ہووی مال

پیسے ݙیویں اَڄ ݙکھال

گھنسن پیسہ ٹُرسِن نال

اُڄڑی جھوک وَسیندے پیسہ

سب کجھ کر ݙکھلیندے پیسہ

نِکھڑے یار ہووِن ترساندے

ݙسِن دیرے دور جہاندے

ہووِن پینڈے لکھ کوہاںدے

مِنٹاں وچ مِلویندے پیسہ

سب کجھ کر ݙکھلیندے پیسہ

وݙے پاپی لوبھی پکّے

ݙیندن دِھیریں گھِندن ٹکّے

روکݨ والے آخر تھکّے

اِیجھاں اَندھ چڑھیندے پیسہ

سب کجھ کر ݙکھلیندے پیسہ

لکھّاں وَدِن تھتِھّوں چُکے

دَر دَر کھاندن دَھکّے مُکّے

لوبھی ڳولِن پیسہ لُکّے

لوبھیں کُوں پِٹویندے پیسہ

سب کجھ کر ݙکھلیندے پیسہ

بِن پیسے نہیں رَکھدے پیار

سڄݨ مِتّر پری پروار

ڳالھ نی سُݨدے رشتے دار

گھاٹے سنڳ تُرڑیندے پیسہ

سب کجھ کر ݙکھلیندے پیسہ

جے کوئی ٻہہ اُدھار چلیندے

پٹکیاں پیریں وِچ رُلیندے

کر کر مِنتاں ہتھ جُڑیندے

کنڈے پِیا کڈھیندے پیسہ

سب کجھ کر ݙکھلیندے پیسہ

پیسہ پیسے نال کماندے

پیسے کوں پیا پیسہ چاہندے

پیسہ دُرک پیسے ݙو آندے

پیسہ ونڄ ڳلیندے پیسہ

سب کجھ کر ݙکھلیندے پیسہ

پیسے کیتے ݙکھے تھیون

کَتّنِ دُھوون رنگِّن سِیوِن

چھیڑِن چھنڈکِن چھاݨن پیہون

سئے سئے سوچ پویندے پیسہ

سب کجھ کر ݙکھلیندے پیسہ

ݙیوو پیسہ دیر نہ لانوِن

بھڄن دُھّرِکن اُٹھِّن ٻاہوِن

لش پش کرِّن چاہ پِلواوِن

کئی پا پُڑ وِلویندے پیسہ

سب کجھ کر ݙکھلیندے پیسہ

پیسے جئیں توں کنڈ وَلائی

کوئی درزی تے بݨ ڳے نائی

ٹک ٹوکا کوئی تھے حلوائی

پٹیاں پِیا چِھکویندے پیسہ

سب کجھ کر ݙکھلیندے پیسہ

ہاڑ مہینہ تتّے تَاء وچ

وقت ݙوپہریں ٻلدی بھا وچ

بھوڳڑی کوں پیسے دی چاہ وچ

بھڳڑے پیا بُھنویندے پیسہ

سب کجھ کر ݙکھلیندے پیسہ

پیسے کیتے تھیٹر کھولِن

جوکر چور بزار اِچ رولن

کافیاں ݙوہڑے غزلاں ٻولن

ناچ وَدا نچویندے پیسہ

سب کجھ کر ݙکھلیندے پیسہ

منگدن ونڄ بیگانے کپڑے

نویں تے پُراݨے کپڑے

پانوِن مَرد زنانے کپڑے

مرد کوں رَن بݨیندے پیسہ

سب کجھ کر ݙکھلیندے پیسہ

کئی دھووِن کپڑیاں دی گھاݨی

ہک سردی ٻیا ٹھڈھا پاݨی

تھڑکݨ لڳی جند نماݨی

سارا بُت کمبویندے پیسہ

سب کجھ کر ݙکھلیندے پیسہ

پیسے کیتے ٹُٻدِن کھوہ

ڈھاندِن بِھکاّں تھیندِن دُھو

کمبدا دِل تے وڑدا روح

جِھکّے کھوہ ٹٻویندے پیسہ

سب کجھ کر ݙکھلیندے پیسہ

ہووِن پے تِکھّے دَریا

گھمّر گھیر تے گھاݨی ڈھا

ٻیڑیاں چِھکِنّ لہن ملاح

غوطے پیا کھویندے پیسہ

سب کجھ کر ݙکھلیندے پیسہ

کئی کئی رات دیاں منجھیں چارن

راتیں جنگلاں وِچ گزارِن

شوکِن نانگ تے سر چا وارِن

موت دے بار چویندے پیسہ

سب کجھ کر ݙکھلیندے پیسہ

مُنشی مَہر مُشیراں کولہوں

دانشمند وزیراں کولہوں

راجے رہن امیراں کولہوں

کاٹھیاں ڳوہے چُݨویندے پیسہ

سب کجھ کر ݙکھلیندے پیسہ

چھاݨن کنڈے ݙکھ کشالے

نہ ہن کنڈے چھاندݨ والے

ہتھاں پیراں پئے ڳے چھالے

بھوگ وَدا بُھڳویندے پیسہ

سب کجھ کر ݙکھلیندے پیسہ

پیسہ ہوندیں موج اُݙائی

خدمت وچ ہَن نوکر کائی

مُکّے پیسے تھے سودائی

ہوش حواس بُھلیندے پیسہ

سب کجھ کر ݙکھلیندے پیسہ

پیسے کیتے کرن عیّاری

پِھرّن گولے بݨن مداری

پھردے راہوِن دُنیا ساری

چکرّ پیا مَرویندے پیسہ

سب کجھ کر ݙکھلیندے پیسہ

سخی سرور ݙیکھو جا کے

ٻہندے ٻال پہاڑ تے آ کے

ہیٹھوں پیسہ ݙیو ݙکھاکے

تلّے تُرٹ اَنویندے پیسہ

سب کجھ کر ݙکھلیندے پیسہ

سارا ݙینہہ تُوں سُتّا رہندیں

نِت اُٹھدیں روٹی کھاندیں

روٹی کھا منجے تے ڈھاندیں

سُتیں کون اَن ݙیندے پیسہ

سب کجھ کر ݙکھلیندے پیسہ

اُٹھی پیارا اَکھّیں کھول

محنت کر مزدوری ڳول

ہتھاں پیراں کوں وی چول

گھر وچ کون پٹھیندے پیسہ

سب کجھ کر ݙکھلیندے پیسہ

ہر کوئی کھاندے کر مزدوری

کر مزدوری کھاندے چُوری

کوڑ دے نال نی پوندی پوری

کوڑ کنوں نٹھویندے پیسہ

سب کجھ کر ݙکھلیندے پیسہ

نال سچائی دے کھٹیں کھاویں

ݙکھی ݙیکھ نہ کہیں کوں ساہویں

جیکر تُوں چنڳے کم لاویں

جنتّ وچ پُچیندے پیسہ

سب کجھ کر ݙکھلیندے پیسہ

ݙیندن کُوڑی وَنڄ گواہی

ہندو ‘ مسلم ‘ سِکھ ‘ عیسائی

ویندن چوراں کوں چُھڑوائی

سادھاں کوں پیا ڈھکویندے پیسہ

سب کجھ کر ݙکھلیندے پیسہ

ٻولن کوڑ کچہری جا کے

چیندے قسماں دب دَبا کے

راضی تھیندے دَھرم گنوا کے

دَھرم شرم ڳلویندے پیسہ

سب کجھ کر ݙکھلیندے پیسہ

پیسے کیتے دھرم نہ ڳال

پیسہ محض نہ ڄلسی نال

ڄلسِن تیݙے نال اعمال

بھٹکیاں کوں بھٹکیندے پیسہ

سب کجھ کر ݙکھلیندے پیسہ

سوچ ذرا تُوں بندہ رَب دا

آکھ ہے سئیں رازق سب دا

اُتھاں کہیں کوں پھٻ نی پھٻدا

اِتھاں پچ پچیندے پیسہ

سب کجھ کر ݙکھلیندے پیسہ

خالی آیوں خالی ویسیں

نہ کجھ آندی نہ کجھ نیسیں

پاپ کریسیں بھوڳ بُھڳیسیں

اَنت سمے چُکویندے پیسہ

سب کجھ کر ݙکھیندے پیسہ

پلّے جیندے ہووے سَو

سَو والے کُوں سَو سَو بَھؤ

ساری رات جھلیندے کئو

نندر آرام کھنیندے پیسہ

سب کجھ کر ݙکھلیندے پیسہ

جیندے اندر ہِن ہزار

گھروں نہیں نکلدے ٻاہر

متاں آوِن چور چکار

پہرے دار بݨیندے پیسہ

سب کجھ کر ݙکھلیندے پیسہ

جیندے گھر وچ لاتھے لکھ

لکھ دی ݙاڈھی رکھدن رَکھ

اصلوں نہیں نُٹیندے اَکھ

تارے پیا ڳݨویندے پیسہ

سب کجھ کر ݙکھلیندے پیسہ

رکھدن جو صندوقاں ݙٹ

ݙردن نہیں وچھیندے کھٹ

بھوئیں تے سمدن آنے پَٹ

رات ݙینہاں جگویندے پیسہ

سب کجھ کر ݙکھلیندے پیسہ

کیونکہ لوک کریندن چوری

کوئی چوری کوئی زورا  زوری

نہ ُگݙی نہ رہسی ݙوری

کوئی چوری سکھلیندے پیسہ

سب کجھ کر ݙکھلیندے پیسہ

آہدا موجیؔ مُلک پِھرندر

کِتھ لݙ ڳے قارون ‘ سکندر

سوچ ذرا تُوں دِل دے اندر

تیکوں پیا پھرویندے پیسہ

سب کجھ کر ݙکھلیندے پیسہ

…………

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ، ملتان