نظام الدین اورنگ آبادی

شیخ المشائخ خواجہ شاہ نظام الدین اورنگ آبادی چشتی نظامی اورنگ آباد شریف، انڈیا دے مشہور بزرگ ہن۔

ڄم

شاہ نظام الدین اورنگ آبادی چشتی 1071ھ وچ قصبہ نگراؤں (کاکوری) وچ پیدا تھئے۔ آپ دے بزرگ ٻاہر کنوں آ کے اتھاں آباد تھئے ہن۔ انہاں دی نسبت شہاب الدین سہروردی دے واسطے نال ابوبکر صدیق تک پہنچدی ہے۔

تعلیم و تربیت

آپ دا گھرانا علمی تے روحانی گھرانا ہئی۔ ایں سانڳے آپ دی تعلیم و تربیت اپݨے وطن وچ ہی تھئی۔ ایندے بعد دہلی دے اہل کمال دی شہرت سݨ کے باقی تعلیم کیتے آپ دہلی پہنچے۔ دہلی اوں ویلے وی برصغیر پاک و ہند دا پایہ تخت ہئی۔ شاہ نظام الدین اورنگ آبادی چشتی حصول علم کیتے دہلی پہنچے تاں آپ نے شیخ کلیم اﷲ شاہ جہاں آبادی دا وݙا شہرہ سݨیا۔ آپ دے دل وچ ایہ خواہش پیدا تھئی جو شیخ کلیم اﷲ شاہ جہاں آبادی دی خدمت وچ حاضر تھی کے فیض حاصل کرن۔

بیعت و خلافت

آپ دی شیخ کلیم اﷲ شاہ جہاں آبادی نال بیعت ہئی۔ شیخ نے تکمیل علم تے آپ کوں خرقہ خلافت نال وی نوازیا۔ انہاں دا شیخ دے اکابر خلفاء وچ شمار تھیندا ہے۔ تکمیل علم تے حصول خلافت دے بعد دکن دی ولایت آپ کوں سپرد کیتی ڳئی تے ہدایت فرمائی جو اورنگ آباد وچ ونڄ کے مستقل سکونت اختیار کرن۔ مرشد دے حکم دے مطابق آپ اورنگ آباد چلیے ڳئے۔ اتھاں ذکر و فکر مراقبہ وچ مشغول تھی ڳئے تے زندگی بھر اتھائیں رہ کے مخلوق خدا دی خدمت تے رشد و ہدایت دا کم کریندے رہے۔

تصنیف

آپ نے کئی کتاباں تصنیف کیتیاں، جنہاں وچ "نظام القلوب" مشہور تھئی۔ ایہ اذکار تے اشغال دے متعلق ہے۔

خلفاء

آپ دے بہت سارے خلفاء ہن، چند ہک جنہاں نے کافی شہرت پاتی:

• 1) خواجہ فخر جہاں دہلوی جیہرے آپ دے صاحبزادے تے جانشین وی ہن
• 2) خواجہ مگار خان
• 3) سید شاہ شریف
• 4) شاہ عشق اﷲ
• 5) شاہ محمد علی خواجہ نور الدین
• 5) غلام قادر خان
• 6) محمد یار بیگ
• 7) محمد جعفر
• 8) شیر محمد
• 9) کرم علی شاہ

و فات

شاہ نظام الدین اورنگ آبادی چشتی نے ٻیاسی (82) سال دی عمر وچ 12 ذیقعد 1142ھ کوں وفات پاتی۔ آپ دا مزار اورنگ آباد دکن وچ زیارت گاہ خاص و عام ہے۔

اولاد وامجاد

آپ دی اہلیہ محترمہ دا تعلق سید بندہ نواز گیسو دراز دے خاندان نال ہئی۔ آپ دی اولاد وچ پنج صاحبزادے تے ہک صاحبزادی ہئی:

• 1) ۔ محمد اسمعٰیل
• 2) غلام معین الدین
• 3) غلام بہاء الدین
• 4) غلام کلیم اﷲ
• 5) مولانا فخر الدین فخر جہاں