نصاب دے حصے

سکول دی رہنمائی وچ ٻالاں کیتے جو کجھ کیتا کرایا ون٘ڄے نصاب سݙویندا ہے، نصاب دے چار حصے ہن۔ مقصد،

مواد، پڑھاوݨ دے طریقے تے جائزہ

مقصد

تعلیم دا مقصد معاشرے دا سدھار ہے ایں سانگے نصاب دا مقصد وی اسلامی جمہوری اقدار دا ودھارا ہے۔ ایں مقصددے مطابق تعلیم مواد چݨیا ویندے۔

تعلیمی مواد او کجھ ہے جو پڑھایا سمجھایا ویندے۔

ایں تعلیمی مواد کوں پڑھاوݨ کیتے سوکھا تے دلچسپ بݨاوݨ کیتے نفساتی اصولاں دے مطابق سرگرمیاں نال پڑھایا وین٘دے۔

چھیکڑ وچ ایہ ݙٹھا ویندے جو اساں آپݨے مقصد ٹھیک طرحاں حاصل کیتے ہن یا کائناں، ایں عمل دا ناں جائزہ ہے۔

جائزہ دیاں ݙو قسماں ہن:

تشکیلی جائزہ: جہڑا جائزہ کہیں کورس یا شئے پڑھاوݨ دے درمیان، یا روز دا، یا ہفتہ وار، یا ماہوار یا سہ ماہی ہووے اوں جائزے کوں تشکیلی جائزہ آہدے ہن۔

اختتامی جائزہ : سال دے آخر یا کورس دے اخیر وچ گھدا ون٘ڄݨ آلا جائزہ اختتامی جائزہ ہوندے۔ مثلاً کہیں وی جماعت دا سالانہ امتحان، بی اے دا امتحان۔