نسیم علی پوری

1945ء تا ۔۔۔۔۔

نسیم علی پوری اردو تے سرائیکی دے مہاندرے شاعر تھی گزرین ۔جیڑھے جو تحصیل علی پور دے ہک چھوٹے جھئیں قصبے حسݨ والا وچ 1945ء کوں پیدا تھئے ، مڈل تک تعلیم حاصل کیتی۔نسیم دا تعلق علی پور دے ہک مذہبی خاندان گبول فیملی نال ہا ۔ آپ دے ݙا ݙا مولا نا غلام محمد خان وی سرائیکی دے شاعر ہن۔جیڑھے جو حضرت خواجہ غلام فریدؒ دے ہمعصر تے انہاں کنوں بٖہوں متاثر وی ہن۔مولانا غلام محمد خان دا ہک قلمی نسخہ وی ’’نظارے‘‘ دے نا ںنال موجود ہا پیا، جیندے وچ زیادہ تر صوفیانہ رنگ دی شاعری ہئی۔نسیم علی پوری تے زکریا یونیورسٹی دی طرفوں 2006ء وچ ہک خصوصی تحقیقی مقالہ بعنوان ’’نسیم علی پوری کے اردو کلیات کی تدوین مع مقدمہ‘‘ وی مرتب تھی چکے۔کوشش دے با وجود نسیم علی پوری دی صرف ہک سرائیکی غزل ملی ہے جو پیشِ خدمت ہے۔

(1)غزل

کہیں پئی ہے دلِ رنجور دیاں قسماں ودا کھاواں

میں خود مختار کیوں مجبور دیاں قسماں ودا کھاواں

میکوں خود حسن مرضی نال اپݨاں راز داں جوڑیئے

میں کیوں جنّت خریداں ، حور دیاں قسماں ودا کھاواں

میݙا خود قلب کعبہ ہے ، جتھاں جلوے ہی جلوے ہن

میں کیوں گٖولاں بہانے ، طور دیاں قسماں ودا کھاواں

نظر منظور کیتے میں چُݨئے دل کوں پسند آگٖئے

میں کیوں کہیں دے نظر منظور دیاں قسماں ودا کھاواں

انا الحق آکھ گٖن جو آکھ گٖن، میں زندگی چہنداں

ودا پھاسیاں چڑھاں منصور دیاں قسماں ودا کھاواں

نسیمؔ آخر کݙاہیں تاں کھیݙ دنیا دی ختم تھیسی

ہُݨیں لا راز کھولاں ، دور دیاں قسماں ودا کھاواں

٭٭٭