نذیر آصف خیال

اصل ناں    نذیر آصف

قلمی ناں    خیالؔ

جٖمنْ        1938ء

جاہ پتہ      ٹِبی بلوچاں ۔خونی برج۔ملتان

نذیر آصف خیال ہک یونانی حکیم ہن۔پورے ملک اچ ٹر پھر کے چوک بزاریں میل مجمع لا کے خلوصِ نیت نال دیسی ادویات ونڈیندن پر دواواں دے نال نال خیال سئیں ادب دے موتی وی وسیب اچ کھنڈائین۔آپ دا نمونہ کلام!

غزل

محبت زندگی دا سوجھلا ہے

محبت کرب ہے ہک ولولہ ہے

محبت زندگی کیتے ہے ایویں

غزل دے کیتے جیویں قافیہ ہے

میں اوندے ناز کیوں نہ سر تے چانواں

او میڈٖا ڈھول ڈٖاڈھا چانجلہ ہے

تباہ کر گٖئی ہے میڈٖے دل دی دنیا

محبت ہے یا کوئی المیہ ہے

خیالؔ اے پچھ تاں سہی کیوں نئیں الیندا

بھلا اے حسن دی کیڑھی ادا ہے

؎بے وفا توں وفا کوں کیا جٖانْے

ڈٖکھے دل دی صدا کوں کیا جٖانْے

میں خدا دا جو واسطہ ڈیواں

توں ہیں کافر خدا کوں کیا جٖانْے

٭٭٭