نبیلہ منیب

نبیلہ منیب
معلومات شخصیت
پیدائش	14 فروری 1960ء (65 سال)  دار البیضاء
شہریت	المغرب
جماعت	یونیفائیڈ سوشلسٹ پارٹی
عملی زندگی
مادر علمی	جامعہ محمد وی جامعہ مونپلیہ
پیشہ	سیاست دان ،  پروفیسر ،  طبیبہ
مادری زبان	عربی زبانیں
پیشہ ورانہ زبان	عربی ،  فرانسیسی
نوکریاں	جامعہ حسن ثانی کاسابلانکا

نبیلہ منیب (عربی: نبيلة منيب؛ پیدائش: 14 فروری 1960ء) ہِک مراکشی سیاست دان زنانی ہِن جو فی الحال یونیفائیڈ سوشلسٹ پارٹی (پی ایس یو) دی جنرل سیکرٹری دے طور تے خدمت انجام ݙین٘دیاں پئین۔ اوہ مراکش دی کہیں وی سیاسی جماعت دی سربراہ منتخب تِھیوݨ والی پہلی زنانی ہِن۔

ابتدائی حیاتی

نبیلہ ہِک سفارت کار احمد منیب دی ڄائی ہِن جیڑھے 1970ء دے ݙہاکے وِچ الجزائر وِچ مراکشی قونصل دے طور تے خدمت انجام ݙتی، جتھاں نبیلہ نے اپݨے بچپن دا کجھ حصہ گزاریا۔ اُنّھاں نے 1977ء وِچ الجزائر دے ہائی اسکول توں گریجویشن کِیتی۔ اُنّھاں دی ماں خدیجہ بیلمکی دا تعلق فاس دے ہِک امیر گھرانے نال ہئی۔ بعد وِچ اُنّھاں نے رباط یونیورسٹی وِچ تے مختصر طور تے مونٹ پیلیئر وِچ تعلیم حاصل کِیتی جتھاں اُنّھاں نے اینڈو کرائنولوجی وِچ پی ایچ ڈی دی ڈگری حاصل کِیتی۔ اِیں دے بعد اُنّھاں کوں یونیورسٹی آف عین چوک، کاسابلانکا وِچ تدریسی عہدہ ݙتا ڳیا، جتھاں اوہ اِیندے بعد توں حیاتیات (اینڈو کرائنولوجی) پڑھین٘دیاں پئین۔

سیاست

1985ء وِچ، جِہڑیلے اوہ فرانس وِچ ڈاکٹریٹ دا مقالہ تیار کریندی پئی ہَن، اوہ یوتھ آف ڈیموکریٹک اسٹوڈنٹس وِچ سرگرم ہَن، ول آرگنائزیشن فار فریڈم آف انفارمیشن اینڈ ایکسپریشن (او ایل آئی ای) تے آرگنائزیشن آف پاپولر ڈیموکریٹک ایکشن (او اے ڈی پی) وِچ شامل تِھئین، جیڑھیاں ٻیاں کھبے بازو دیاں تنظیماں دے نال مِل تے یونیفائیڈ سوشلسٹ پارٹی بݨ ڳئین۔

نبیلہ 2000ء دے شروع وِچ سوشلسٹ یونیفائیڈ پارٹی نال وابستہ ہَن، پر اُنّھاں نے 2011ء دی عرب بہار تے مراکش وِچ تِھیوݨ والے مظاہریاں دے بعد ئی سیاسی طور تے فعال تِھیوݨ شروع کِیتا۔ 16 جنوری 2012ء کوں، اوہ واحد امیدوار دے طور تے اپݨی جماعت دی جنرل سیکرٹری منتخب تِھئین تے اِیں طرحاں مراکش دی پہلی زنانی بݨ ڳئین جیڑھی کہیں سیاسی جماعت دی سربراہ منتخب تِھئی۔

سیاسی اقدامات

2011ء وِچ آئینی ریفرنڈم دے دوران، اُنّھاں نے اپݨی سیاسی تحریک تے ڈیموکریٹک لیفٹ الائنس توں بائیکاٹ دا مطالبہ کریندے ہوئے آکھیا جو آئین جمہوری کائنی کیوں جو اِیہ زیادہ تر اختیارات حکمراناں دے ہتھ وِچ رکھین٘دا ہِے تے اختیارات دی حقیقی علیحدگی دی یقین دہانی کائنی کروین٘دا۔