نافع بن عبدالرحمن المدنی

نافع بن عبدالرحمن المدنیؒ ہک جلیل القدر تابعی، قاری قرآن تے فقیہ ہَن۔ انہیں دی کنیت ابو عبدالرحمن یا ابو رویم ہئی۔ انہیں دا سلسلہ نسب اینویں ہے: نافع بن عبدالرحمن بن ابی نعیم۔ انہیں دا تعلق اصل وچ اصفہان نال ہئی پر ساری زندگی مدینہ منورہ وچ رہوݨ دی وجہ توں مدنی سݙویندے ہَن۔ انہیں دی پیدائش تقریباً 70 ہجری وچ تھئی۔

نافعؒ دا شمار انہیں برگزیدہ تابعین وچ تھیندے جئیں نے علم و فن کوں ودھاوݨ وچ اہم کردار ادا کیتا۔ قرآن مجید دی جنہاں ست قراءتاں تے امت دا اجماع ہے، انہیں وچوں ہک قراءت امام نافع مدنیؒ دی وی ہے۔ تجوید و قراءت وچ انہیں کوں خاص مہارت حاصل ہئی۔ ستر تابعین توں قرآن پڑھݨ دا شرف حاصل ہئی۔ حضرت عبداللہ بن عباسؓ تے ابی بن کعبؓ جئیں صحابہ کرام دے شاگرد بݨیے۔ بعض روایات دے مطابق اوں نے کجھ چھوٹے صحابہ دی زیارت وی کیتی ہئی۔ اصمعی دا قول ہے کہ اوہ قراء، فقہا تے عبادت گزاراں وچوں ہن۔ انہیں کوں قراءت وچ امام اہل المدینہ وی آکھیا ویندے۔ انہیں دا قبیلہ بنی لیث ہئی تے کجھ نے انہیں دا قبیلہ جفویہ وی ݙسیا ہے۔ انہیں دے پیو ابو نعیم تے ݙاݙا عبد الرحمن ہک نال اسلام گھن آئے ہَن جݙاں ایہ ٻال ہَن۔ انہیں دے ݙاݙا دا اسلامی ناں نعمان رکھا ڳیا ہئی تے ابو نعیم کنیت ہئی۔ نافع دی نسبت کݙہیں پیو تے کݙہیں ݙاݙا دی طرف کیتی ویندی ہے ایں واسطے نافع بن عبدالرحمن وی آکھیے ویندے ہن تے نافع بن ابی نعیم وی۔ اوں حدیثاں ٻہوں سارے تابعین توں روایت کیتیاں ہن پر قراءت وچ انہیں دے اصل استاد عبدالرحمن بن ہرمز الاعرج تے ابو جعفر یزید بن القعقاع ہَن۔