نادر لاشاری

اصل ناں محمد منشاء ہے۔آپ 1965ء کوں پیدا تھئے۔ مڈل تک تعلیم حاصل کیتی۔خوش گفتار تے پیار کرݨ آلے انسان ہن۔تحصیل یزمان ضلع بہاولپور اچ رہائش پذیر ہن۔ سرائیکی کٹھ ہوون یا سرائیکی مشاعرے آپ بھرپور شرکت کریندن۔ سرائیکی شاعری ڈاڈھی کمال دی کریندن۔ نادر لاشاری اپنے اتے کجھ بیاں پابندیاں وی عائد کر کے شاعری کیتی ہے۔ اوہ ہے انہاں دی بلا نقطہ شاعری۔ ایہ کوئی معمولی تجربہ نہیں۔کوئی شاعر ہک ڈوہڑہ یا نظم تاں لکھ ڈکھالے،لگ پتہ ویسی۔لیکن نادرؔ تاں بلا نقطہ شاعری دیاں ڈو کتاباں ’’آس ادھوری‘‘ تے ’’آس سموری‘‘لکھین۔

اصل ناں      محمد منشاء

قلمی ناں      نادر لاشاری

جمن          1965ء   

تعلیم         مڈل

فون نمبر       03468814968

جاہ پتہ        ڈاکخانہ جھوک پنوار تحصیل یزمان ،ضلع بہاولپور

حضرت خواجہ فریدؒ دی روہی دا واسی نادر لاشاری وکھری سوچ دا مالک تے وکھری شاعری دا خالق شاعر ہے۔شاعر تاں پہلے وی اوزان تے بحراں دی پابندی اوکھا تھی کے نبھیندے لیکن نادر لاشاری اپنے اتے کجھ بیاں پابندیاں وی عائد کر کے شاعری کیتی ہے۔ اوہ ہے انہاں دی بلا نقطہ شاعری۔ ایہ کوئی معمولی تجربہ نہیں۔کوئی شاعر ہک ڈوہڑہ یا نظم تاں لکھ ڈکھالے،لگ پتہ ویسی۔لیکن نادرؔ تاں بلا نقطہ شاعری دیاں ڈو کتاباں ’’آس ادھوری‘‘ تے ’’آس سموری‘‘لکھ مارین،تے اوہ وی تقریباََڈِڈھ ،ڈِڈھ سو صفحیاں دیاں کمال نہیں؟تے ول ایں تجربے دے نال نال کجھ بئے تجربے وی کیتے ہن ۔مثلاََ انہاں ڈاہ ڈوہڑے ایجھیے لکھئے جنہاں کوں پڑھن ویلھے ہوٹھ نہیں ملدے۔یعنی ہوٹھاں کوں ملاون والے ڈو حرفاں اچوں ’’ب‘‘با نقطہ ہوون پاروں پہلے وی کتاب اچ شامل کائنی تے ول اِنہاں ڈاہ ڈوہڑیاں وچ اُنہاں ’’م‘‘ کوں وی استعمال نہیں کیتا۔تے ایویں 20ڈوہڑے اوہ لکھئے ہن جنہاں وچ باقی بلا نقطہ 20حروف بالترتیب ہک ہک ڈوہڑے وچ ہک ہک حرف شامل نہیں کیتا گیا۔علاوہ ازیں نادر صاحب دیاں بیاں وی کئی کتاباں چھپ چکیاں ہن۔تے ہن آپ دیاں بلا نقطہ ڈوغزلاںد ے نمونے ڈیکھو!

(1)غزل

ڈھول دی سک ہئی کوسا آگئے

دل ساڈے کوں ہوسا آگئے

سڈِّ م ڈھول کوں آ مل ماہی

ڈھول کوں سو سو مو سا آگئے

کاوڑ دی کئی گالھ ہے ڈس ہاں

کہڑھی گالھوں روسا آگئے

دل کوں ڈاڈھی سک ہئی ماہی

دل کملی کوں سوسا آگئے

وِسرو کاوڑ، رل کے کھاؤں

لَے کے ڈھول سموسا آگئے

(2)غزل

ڈو دل دی گال ہک ہے

ساڈا وی حال ہک ہے

مل  گئے  مہر دا  ما ہی

مک گئے سوال ہک ہے

ڈکھ درد ساڈے رلے

سک ہے، ملال ہک ہے

سکّھاں دے اساں موہری

ڈکّھاں دی ڈھال ہک ہے

ساڈا ڈوہاں دا ہک ساہ

سر دا وی وال ہک ہے