نئوں نندے دے گھر

نندا رام ساوا سوکھا آدمی ہا، وپار کریندا ہا ۔ پھٹی ، کݨک، جوار ، ٻاجھری تے ہر جنس دا خریدار ہا ۔ ہر شئے دا حساب کتاب رکھدا ہا، لیکھ تے لیکھے آلا بندہ ہا پر کنجوس ݙاڈھا ہا۔ پھٹی دی مُد کوں ایں واری سیزن چنڳاں رہ ڳیے۔ پا پیسہ چنڳا کما گھدُس۔ خیال آئس جو پھر ٹُر آواں ۔ اپݨے یار ٻیلی ، سکیں ، سوڑیں تے عزیز رشتے داریں کوں مل آواں ، کجھ بچت دی بچت تے سیل دی سیل وی تھی ویسے ۔

نندا چادر مونڈھے تے رکھ تے ٹرݨ توں پہلے اپݨے پُتر بگے مل کوں آکھدے:  ’’ پُتر سارا گھر سنبھالیں ، ڈھور ڈھاڈیں دا خیال رکھیں ۔ انہائیں کوں ٻدھݨ چھوڑݨ تے گھا پٹھا ویلھے سِر ݙیویں ۔ گگدام ءِ ن متاں میݙی جند کوں پِٹن۔ آئے ڳے دا خیال رکھیں تے فضول خرچے اصلوں نہ کریں ۔‘‘

سویں سنجھ کوں نندا ٹُر پے، نران نال آلی وستی رہݨ آلے سنگتی موجی کول کیتُس۔ رام بھلی کرے۔ تنواراں اڳوں تے ٹُر پے ، ݙو پہر جگدیش کنے تے رات ورما جی کنیں ونڄ ٹکئے ۔ٻے ݙینھ ٻی وستی ، ایویں کریندیں ، کریندیں ، پھردیں ٹُردیں نندے کوں نئوں ݙینھ لڳ ڳے۔ نانویں ݙینھ گھر آئے تاں ذال پُچھیس جو مویا اتنے ݙینھ لا آئن، کتھ رہ ڳیں تے کیا کریندا رہ ڳئیں ؟

نندا آکھدے:’’ متریں دایں مزمانیاں کھاتے، کیتی بچت ڈھیر اے ، ودھ توں کیا پُچھدیں سیر دی سیر اے ٻی سبھ خیر اے ۔‘‘

نندا ذال کوں آکھدے : ’’ میݙا پُتر بگا کتھ اے ؟‘‘

’’ اِتھائیں ہا ، ہُݨے آ ویسے ‘‘

بگے مل ، پیوں کوں جھک تے پیر ہتھ لا تے ملیا ، پیو آکھیا : ’’ ٻچڑا حال حویلہ ݙے، کوئی آیا ڳیا ۔ ‘‘

پُتر آکھدے : ’’ ابا ٻہوں مزمان آئن ۔ ‘‘

نندے دا اُدرکا نکتے تے آکھدے : ’’ ہاں ‘‘

پریشان تھی تے نندا حساب منگدے ۔ بگا پیو دی عادت توں پروکا تے پہلے دا سونہاہا، پرچہ چا تے اڳوں چا رکھیس ۔

نندا کھیسے ءِ چ ہتھ مارݨ پے ڳیا، گڈی آلے ݙوہیں کھیے تے ولا گڈی دے اندروں کھیسہ ݙٹھس۔ ویڑا تھی تے ٹیبکیں کوں ہتھ مارے ، ذال کوں سݙ تے آکھدے ’’ اڑی چندری کتھ مر ڳئیں ؟‘‘

ذال کوڑیج تے آکھدی اس : ’’ کیا بھنڈر ایں ۔‘‘

’’ اڑی ٻیڑی تری ،عینک نی لبھدی ، جلتی جلدی عینک لبھ ݙے ، بگے مل دا حساب ݙیکھداں ، آکھدے ڈھیر مزمان آئن ۔‘‘

نندرے دی ذال انگل منہ ءِ چ پا تے آکھدی اے :’’ ہاں تے ، ناں گیا ، تیݙا ایجھا چیتا چل ڳے ،اکھیں تے جیرھی رکھیں ٻیٹھیں اے عینک اے یا کھوپن۔‘‘

نندا تکھے تکھے ہتھ مریندے، مار ! میں تاں بھلیا ٻیٹھاں ۔ اے آکھ تے حساب آلا پرچہ ݙیکھݨ پے ویندے ۔ پہلے سارے پرچے پڑھدے ،ہک واری ولا پڑھدے،تریجھی واری ولا پڑھ ے چپٹی وجٖا تے ہولے ہولے رنڑکا لاوݨ پے ویندے ۔

نندا ڳیا نئوں جٖہاڑے

نئنوں نندے دے گھر

نندے ٻہہ حساب کیتا

نندا گھر دا گھر

حوالہ

معروف سرائیکی لکھاری سئیں ظہور احمد دھریجہ دی کتاب (سرائیکی اجرک) وچوں چوݨ