میݙی ملازمت

میݙی ملازمت گورنمنٹ مڈل سکول میانوالی شیخاں دے وچ تھی ڳئی ۔اوں ویلھے اے مڈل سکول ہا ، محترم سئیں ماسٹر کریم بخش انور صاحب تے میں صلاء کیتی جو اینکوں ہائی سکول کیتا ونڄے ۔ اساں ہک ٹیچراپݨے خرچے تے بی اے بی ایڈ رکھیا ۔ انہاں دا اسم گرامی ماسٹر عبدالغنی گوہر ہا۔ اساں انہاں دی تنخواہ دی خاطر ٻہوں تݨ مرییندے ہاسے۔ اساݙا مشن تے شوق اے ہا جو اتھاں دے ٻال میٹرک کرݨ سانگے پرے دے پندھ نہ کرن ۔ اساں اپݨی کوشش اچ کامیاب تھی ڳیوسے ۔اساݙا میانوالی شیخاں دے سردار عبدالصمد رحمانی صاحب کوں پتہ لڳا انہاں اساکوں سݙیا تے آکھیا جو تُساں ٹیچر دی تنخواہ سانگے اوکھے نہ تھیوو، اے تنخواہ میں ݙیساں ۔ ول او تنخواہ ݙیندے رہ ڳئے۔

الحمد للہ ! چار پنج مہینے دے بعد اساݙا سکول اپ گریڈ تھی ڳیا۔ کیونجو طلبہ دی تعداد ٻہوں زیادہ ہئی۔ ایں موقع تے اساں اپݨے استاد قیس فریدی صاحب کوں وی گھن آیوسے تے انہاندی ملازمت اتھائیں کرا ݙتوسے ۔

حوالہ

کتاب "قیس فریدی ۔ فن شخصیت اَتے شاعری "  ترتیب پیشکش  : مہر حامد علی شاکر سیال ، ناشر جھوک پبلشرز ، ملتان