میݙی خواہش تے کوشش

میݙی کوشش تاں ایہا ہے جو اپݨے اُستاد دیاں ساریاں کتاباں تے ہر تحریر چھپواواں اڳوں اللہ مالک ہے ۔ پر میں اے وی ݙسی ونڄاں جو اے کتاباں اصلوں نہ چھپوا سڳاں ہا جیکر ’’جھوک‘‘ اخبار دا میکوں تعاون حاصل نہ ہووے ہا ، کاغذ پترے دے پیسے میݙے پتر ݙے ݙیندن ، اصل کم تا ںکتاباں بݨاوݨ ، جوڑݨ تے کٹھا کر تے چھپواوݨ ہے ۔ ’’جھوک‘‘ آلئیں دی خاص طور تے میݙے اَدے ظہور دھریجہ سئیں دی اللہ حیاتی رکھے وݙے کم کر ݙتن ، اتنیاں کتاباں چھپ ڳن جو ݙیکھ تے دِل باغ باغ تھی ویندے ۔ میݙے اُستاد قیس فریدی صاحب دھریجہ پریس تے ݙاڈھے خوش ہَن ، منیر دھریجہ سئیں تے ظہور دھریجہ سئیں کوں ݙیکھدے ونڄن ہا خوشی کنوں نہ ممدے ہَن حالانکہ اساں اپݨے اُستاد کوں اتنا خوش نہ ݙیکھدے ہاسے ، چند لوک ہن ، انوری صاحب ، بندہ ناچیز بقلم خود ، کیفی صاحب ، غلام علی شاہ صاحب ، جعفری صاحب تے کجھ ٻئے لوک ، باقی کم آبا خ کوں خا ہا۔ اُستاد جݙاں ڳالھیں کریندے ہَن تاں حریانی تھیندی ہئی جو جوان کنے اتنا علم کتھوں آئے اساں وانگے تعلیم وی پوری سوری ہئی پر اُنہاندا مقابلہ نہ یونیورسٹی آلے کر سڳدے تے نہ کوئی علامہ ۔اُستاد صاحب علم دا دریاہن ، دنیا دے ہر موضوع تے ڳالھ کریندے ہن ، وݙے شاعر ، وݙے نثر نگار ، وݙے ڈرامہ نگار ، وݙے اداکار ، وݙے ہدایتکار ، وݙے اُستاد ، کیرھی خوبی ہے جو اُنہاندے وچ نہ ہئی ۔

حوالہ

کتاب "قیس فریدی ۔ فن شخصیت اَتے شاعری "  ترتیب پیشکش  : مہر حامد علی شاکر سیال ، ناشر جھوک پبلشرز ، ملتان