میݙا جیویں توں ڈھولا

سہرا

میݙا جیویں توں ڈھولا ، میݙا جیویں توں ڈھولا

میݙی ݙیکھیں توں کمال ، میں تاں جوڑیا دل نال

تیݙا پُھلاں والا چولا ، میݙا جیویں توں ڈھولا

واڳاں موڑ ماہی جلدی آ تاں سہی

چولا سیتا ہمی ڳل پا تاں سہی

ݙیکھن اپݨے پرائے ، میݙے رَل ہمسائے

ذرا سوچیں توں ڈھولا ، میݙا جیویں توں ڈھولا

چولا سیتا ہمی تیݙی دل دا ماہی

فرق سوہݨا نہیں ہک تِل دا ماہی

ݙیکھیں چولے دی بہار ، کیویں سوہݨے ہِن ہار

لایا سونے دا تولا ، میݙا جیویں توں ڈھولا

تیݙا چولا میں ماہی میں بݨایا اے عجب

توں ݙیکھ سہی رنگ لایا اے عجب

چولا پیسیں جݙاں پا ٹھمکیسیں جݙاں

سڑ تھیسن کولا ، میݙا جیویں توں ڈھولا

حوالہ

سرائیکی سہرے ، مرتب: شائستہ ظہور ، چھاپہ خانہ : جھوک پرنٹرز، ملتان