میں کوئی شئے کائنی
شادی خوشی دا ناں ہے ، شادی تے خوشی دے میل ہوندے ہن ، اَٹھ ݙینھ پہلے نغارے آ ویندے ہن ۔ ساری ساری رات نغارے تے جھمر ہوندی ہئی ، جاگے آلی رات نٹیں دا تماشہ ہوندا ہا ۔ اسا ں اپݨی سنبھل واݨ ءِچ صابر مبارکپوری دی ٹولی کوں سُݨیا ،صابر مبارک پوری شاعر ، موسیقار تے صداکار ہن ۔ عاشق رسولؐ ہن ، کافیاں تے مولود لکھدے ہن ، شعر بعد ءِچ لکھدے ہَن ، طرز پہلے بݨیندے ہن ، میݙے ابا سئیں نال یاری ہئی ، ابا سئیں ہنائیں دی پیریں آنگے قدر کریندے ہن ، مولوی صابر صاحب وستی اَمدے ہَن تاں ابا سئیں آپ دی سیوا داری کریندی ہن تے صابر سئیں دے ناں تے ٹھر ٹھر ویندے ہن۔ نٹیں دا تماشہ ہنائیں دی روزی دا بہانہ آکھو یا ائیں چا آکھوں جو ایں روپ دا بہروپ بݨائی ودے ہَن ۔نتاں سچ تاں اے ہے جو مولوی صابر اللہ دے وَلی ہن ، عاشق رسولؐ ہن ۔ مولوی صابر صاحب دی ٹولی ءِچ سُریلے فنکار ہوندن ہن ، ݙوہڑے ایجھے سوہݨے پڑھدے ہن جو سُݨ تے سریراں چڑھدیاں ہَن ۔ مولود مولوی صیب آپ شروع کریندے ہن ۔ پہلا مصرعہ آپ چاون ہا ، سوزی نال رَل تے سماں بݨا ݙیندے ہن ۔ ٹولی وچ نقلی وݙے کردار کریندا ہا ، کھلویندا ایویں ہا جو کِھل کِھل تے کُکھیں ءِچ درد پئے ویندا ہا ۔ صدر ایوب دا دور ہا اوندا وݙا ناں ہا ۔پیا نقل کرے ، پھوت کنوں آکڑیا ودا ہووے ۔ ٹولی دا سردار اَکھیندے ، پھوتی دا پُتر آ پُھنڈیا ودیں ، توں کوئی تھاݨیدار بݨ ڳیں ؟ نقلی آکھدے ، اُتے ، ڈی ایس پی بݨ ڳیں ؟ نقلی آکھدے اُتے ، سردار آکھدے ووئے بھولڑیں دا پُتر آ ! توں کئی ڈی آئی جی بݨ ڳیں ؟ نقلی آکھدے ایں توں وی اُتے ، او آکھدے ایں توں اُتے ۔ بھتار کوڑیج تے آکھدے ووئے نولوں دا پُترآ! توں کئی وزیر بݨ ڳیں ؟ او آکھدے ایں توں اُتے ۔ او آکھدے ووئے یٻل دا پُتر آ توں صدر بݨ ڳیں ؟ نقلی آکھدے ایں توں اُتے او آکھدے ایں توں اُتے تاں کوئی شئے کینھی ہوندی ، نقلی آکھدے میں وی کوئی شئے کینھی۔
حوالہ
کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان