میں پاݨی گھِن آیاں
فیضو توݨی جو کھاتے پیتے گھر دا بندہ ہا ۔ او وَل وی کہیں غریب کوں بُکھا تَسا ݙیکھ تے نہ سہندا ہا۔ اوندی ہمیش کنوں ایہا خواہش ہئی جو کوئی غریب نہ راہوے۔ تَسا کوئی نہ ہووے۔ پیوݨ کوں پاݨی دَریہہ ہووے۔ آہدا ہا پاݨی حیاتی ہے۔ پکھی ، فصلاں ، جانور اَتے انسان سب پاݨی دے متھاج ہِن۔ علاقے دے مڈل سکول نال اُونکوں وݙی محبت ہئی۔ کیوں جو سکول وچ ٻال پڑھدے ہن۔ ٻالاں نال اُو ہمیشاں پیار کریندا ہا۔ سکول وچ پیوݨ دے پاݨی دا پکا انتظام نہ ہا۔ تاں اُو پرّے کنوں پاݨی دے گھڑے بھر بھر تے سکول آن رکھیندا ہا۔ سارا ݙینہہ سکول رہ ویندا ہا۔ اُو سکول دا ملازم نہ ہا اُوندی تنخواہ وی کوئنا ہوندی ہئی، پَر اُو سکول دی ڈیوٹی سکول دے ملازمیں کنوں وی ڈھیر ݙیندا ہا۔ غیر حاضر ٻالیں کوں پڑھݨ واسطے گھروں سݙ آندا ہا۔ جیڑھا استاد سکول دیر نال آوے ہا اُوں کنوں وی پُچھ ڳچھ کر گھِندا ہا۔ سکول دے وقت توں بعد باقی ݙینہہ شہر دے نال واہندی نہر تے گزریندا ہا۔ نہر چھی ماہی ہئی تے اُو اکثر سُکی نظر آندی ہئی۔ نہر دے تل وِ چ کھڑ تے ہتھیں وچ ریت پا تے ݙیدھا رہ ویندا ہا تے نہر دے پاݨی نال تار تھیوݨ دے بارے سُچیندا رہ ویندا ہا۔اُونکوں ایہہ وی خیال آندا ہا جو نہر دا پاݨی سُکݨ کنوں بعد سوہݨیاں سوہݨیاں مچھیاں کیݙے وَل ویندین۔ نہر وچوں نکلݨ والے پاݨی دے موڳے ہِیں علاقے دی فصلیں کوں پاݨی پلیندے ہن۔پاݨی نہ ہووݨ پاروں فصلاں سُکدیاں نظر آندیاں ہَن تے ایہہ نہر تے ونڄ تے اُنہائیں موڳیاں وچوں سِلھاں تے ٻیا گند کڈھیندا ہا تے جھِکا تھی تے موڳیئیں وچوں جھاتیاں پیندا ہا۔ جو جݙاں نہر وچ پاݨی آسی تاں موگے صاف ہوون۔ سکول وچ کئی اَݨ دھوتے مونہہ والا ٻال نظر آوے ہا تاں کروے وچ پاݨی پا تے اُوندا مونہہ دھویندا ہا۔ تے آہدا ہا جو تہاݙے گھر پاݨی کائنی ؟ تئیں مونہہ کیوں نئیں دھوتا؟میلے کپڑے والے ٻالیں کوں جماعت وچوں کڈھ تے ہیڈ ماسٹر کنے ونڄ تے پیش کریندا ہا۔ تے شکایت کریندا ہا جݙاں نہر وچ پاݨی آندے تساں سال دے کپڑے ہکو واری کیوں نی دھوا گھِندے؟ سکول وچ کہیں کوں گلاس نال پاݨی پلاوے ہا تاں گلاس وچ بچا ہویا اَدھا پاݨی کہیں کوں ویٹݨ نہ ݙیندا ہا۔ تریہہ ہوندی ہَس تاں بچدا پاݨی آپ پی گھِندا ہا۔ یا بچدا پاݨی کہیں درخت دے مُنڈھ وچ سٹ آندا ہا۔ غلطی نال جے کوئی پاݨی ویٹ چھوڑے ہا تاں ݙو ترئے ݙیہاڑے تک اُوندے نال چکری ݙیندا ہا۔ سکول اِچ اخبار آندا ہا ، ہر کہیں کوں آہدا ہا اخبار اِچ ایہہ خبر تاں لبھ ݙیو جو نہر اِچ پاݨی کݙاں آوسی۔ خود اَن پڑھ ہا تے سکول دے چوکیدار دے نال یار ی لئی کھڑا ہا جیڑھا اُونکوں روز اخبار پڑھ تے سݨویندا ہا۔ تے پاݨی دی خبر تاں ضرور اُو پُچھدا ہا۔ نہر ششماہی ہئی مگر ایندے باوجود اُو ہر مہینے نہر تے ونڄ تے پاݨی دا انتظار کریندا ہا۔
اخبار وچ ہک دفعہ نہر وچ پاݨی آوݨ دی تاریخ آڳئی۔چوکیدار تاریخ پڑھ گِدھی تے اخبار ولہیٹ تے ہتھ وچ پا ٻیٹھا۔ چوکیدار فیضو کوں آکھیا مٹھائی کھوا تیکوں پاݨی آوݨ دی تاریخ ݙسینداں۔فیضو چوکیدار کوں مٹھائی کھوائی تے اُوں کنوں اخبار گھِن گھِدا۔ جیندے وچ لکھیا کھڑا ہا جو جمعے دے ݙینہہ ݙوپہریں کوں نہر وچ پاݨی آویسی۔ جمعہ والے ݙینہہ فیضو فجریں نال نہر تے پُڄ گیا۔ نہر دے اُتلے پاسوں ترئے چار میل نہر دے تَل وچ ریت تے سفر کیتا تے ݙوپہریں ویلے پرے کنوں پاݨی آندا نظر آیا۔ فیضو اُتھاہیں جھُمر گھت ݙتی۔ پاݨی وݙی تیزی نال آندا پیا ہا ۔ تھوڑے لحظے وچ پاݨی فیضو تئیں پُڄ ڳیا۔ فیضو ایں پاݨی وچ دھانتا۔ سارے کپڑے پُسائے، اوندے بعد جُتی ہتھ وچ پا پاݨی دے اڳوں اڳوں نہر دے تَل وچ دُھرکدا آیا۔ فیضو اڳوں پاݨی پچھوں۔ ترائے میل دھُرکݨ تو ں بعد پاݨی وستی دے قریب آڳیا تے پاسے کنوں نکلݨ والے موڳیئیں وچوں پاݨی اوندے علاقے دی فصلیں کوں لڳݨ پئے ڳیا۔ فیضو جُتی ہتھ اِچ پاتی ودا ہا ، کپڑے جھٻاروں ہَن۔ اپݨے علاقے والے پاسے ونڄݨ والی کچی سڑک تے دھُرکدا آیا تے نعرہ مریندا ودا ہا۔ ووئے وستی دے لوکو! میں پاݨی گھِن آیاں میں پاݨی گھِن آیاں۔
٭٭٭
حوالہ
[لکھو | ماخذ وچ تبدیلی کرو]کتاب: وتر ساخ (سرائیکی کہاݨیاں) ، مصنف : عبداللطیف بھٹی، ناشر: جھوک پبلشرز ،ملتان