مینگھو فقیر

مینگھو فقیر سئیں غلام حیدر فقیر دے سب توں وݙے ٻال ہن۔ آپ27رجب المرجب 1233ھ وچ ایں جگ وچ آئے۔ آپ دا ناں حبیب اللہ ہئی۔ ہک ݙینہ ہک مجذوب درویش فقیر غلام حیدر دے ٻوہے تے آیا ۔ اوں ننڈھے ٻال کوں دعا ݙتی تے اکھیُس کہ ایں ٻال کوں مینگھو دے ناں نال سݙیا کرو۔ ہوں ݙینہ توں آپ دا ناں مینگھو پئے ڳیا۔ مینگھو فقیر ظاہری تعلیم حاصل نہ کر سڳیئے۔ پر اینکوں باطنی فیض اپݨے والد صاحب کنوں حاصل تھیا تے آپ اپݨے والد دے وصال دے بعد انھاں دی گدی سنبھالی۔ مینگھو فقیر ہر ویلے سرمستی دی کیفیت وچ رہندے ہن۔ آپ صوم صلوٰۃ دے بے حد پابند تے ٻہوں رحم دل تے بے حد سختی طبیعت دے مالک ہن۔ مینگھو فقیر 80سال دی عمر وچ 12ربیع الاول 1313ھ کوں وصال فرمایا۔

مینگھو فقیر دی شاعری وچ ہمہ اوست دے جا جا ھُلے آندن۔ آپ ہک حال صفت صوفی شاعر ہن۔ کلام وچ قرآنی آیات تے احادیث دے مضامین کوں وی وݙی مہارت تے شوق نال ورتیندے ہن۔ آپ دا کلام اندر دے انسانی جذبیاں تے روحانی رمزاں دا سنڄاپو ہے۔ کلام وچ تلمیحات دا چوکھا استعمال کریندن۔ ایں توں علاوہ مقامی علامتاں تے لوک داستاناں دے حوالے نال وی صوفیانہ مضامین دا بیان انھاں دی شاعری وچ ملدے۔

کافی

ݙیکھو بار برہ دا باری ہے

سرعاشقاں دے اظہاری ہے

ݙیکھو چاک پوشاک چودھاری ہے

او ای صاحب تخت ہزاری ہے

ݙیکھو شاہ حسن تے شکاری ہے

مارے تیر کمان کٹاری ہے

ݙیکھو خواب زلیخا زاری ہے

وچ مصر دے تھیا وپاری ہے

ݙیکھو مالک ملک مختیاری ہے

جیویں کربل قتل تیاری ہے

ݙیکھو مینگھا منصب داری ہے

سارا نور جمال جباری ہے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان