مینارہ یادگار

قلعہ ملتان دے عین اَدھ اچ انگریزاں نے اپݨی فتح تے عیدگاہ اچ قتل تھیوݨ آلے مسٹر ایگینو تے مسٹر اینڈرسن دی یاد اچ اے مینار تعمیر کرایا ۔ اے مینار گائو دُم سُرخ پتھر نال بݨیا ہویا ہے تے پنجاہ فُٹ اُچا ہے۔ چبوترہ دے غربی پاسے سنگ مر مر دے ہک ٻہوں وݙے پتھر تے ہک کتبہ کنندہ ہے۔

مینارہ یادگار مشرقی پاسے ترائے ٻیاں انگریزی یادگاراں وی ہن جنہاں تے درج ذیل دے کتبے درج ہن۔’’میجر جارج شیف مونٹیز بمبرٹ دی مقدس یاد اچ جوہز مجسٹی دی ݙاہویں پلٹن دی کمان کریندے ہوئیں 12دسمبر 1848ء کوں 34سال دی عمر اچ قتل تھئے تے کپتان لنگز ورتھ جیڑھے 30سال دی عمر اچ 9ستمبر 1848ء زخمی تھی تے فوت تھئے ‘‘۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء